Коом

Коом

Абхазияда абал чатак. Президент менен эл тирешүүдө…

Бишкек. 9.01.20. informator.kg

Абхазиянын  президенти Рауль Хаджимба эгер өлкөдө нааразычылык уюштуруп жаткандар тынчыбай турган болсо “өзгөчө кырдаал” киргизе турганын кезексиз өткөргөн Коопсуздук Кеңешинин жыйынында жарыя кылды. Бул тууралуу президенттин сайтынан окууга болот.

Ал антип жаткан чакта көчөдөгү оппозициялык маанайдагы көпчүлүк Президенттин имаратына чабуул жасап, ээлеп алуу аракетин токтоткон жок. Ал арада  Абхазиянын Элдик жыйыны да шашылыш чогулуп Сухумидеги балады талкууга алды. Жабык эшик артындагы бул жыйында оппозициялык депутаттар Президентти кызматтан алуу маселесин көтөрүп жатканын «Sputnik Абхазия» жазып чыкты.

Эске сала кетсек, өлкө президентин шайлоодо оппозициялык талапкер «Амцахара» партиясынын лидери Алхаса Квицини жеңишке жетпей калып, ал бул шайлоонун легитимсиз өткөнүн жарыя кылган жана элди укуктарын коргоо үчүн көчөгө чакырган.

Кыргызстанда 2020-жыл айнек идиштерди чыгаруу жана электромобилдерди куроого артыкчылык берилет

Бишкек. 9.01.20. informator.kg

Былтыркы жылдын аягында келечектүү инвестициялык долбоорлордун тизмесин түзүүчү кеңеш 6 ири долбоорду тандап алды. Бул тууралуу экономика министрлигинен кабарлашат.

Анда белгилүү болгондой, аталган кеңеш ПРООНдун “КМШнын аймагындагы туруктуу өнүгүүнү каржылооо үчүн потенциалды бөкөмдөө” долбоорунун негизинде 20дан ашуун долбоорлорду карап чыгып,  алгачкыларды бекиткен.  Ошондой эле долбоорлордун Техникалык-экономикалык негиздемелерин иштеп чыгуу үчүн атамекендик консалтинг компаниясын тандашып, ал өз ишин баштаганы белгилүү болду.

«Бизнес-долбоорлор Жалал-Абад, Yарын, Ысык-Көл аймактарын өз ичине камтып, айнек идиштерди чыгаруу, йоддолгон туз өндүрүү, электромобилдерди куроо, суу эсептегичтерди чыгаруу жана көл жээгине спорттук-денсоолукту чыңдоочу курулуштарды салуу жана өнүктүрүү сыяктуу багыттарды тандады”,-деп белгилейт министрлик.

Бишкекте алдамчылыкка шектелген аял кармалды

Бишкек. 8.01.20. informator.kg  Бишкекте алдамчылыкка шектелген аял киши кармалды. Бул тууралуу борбордук милициядан кабарлашты.

Анда маалым болгондой,  Бишкек ШИИБсине Т.Д. аттуу жашоочу кайрылып, 2019-жылы андан батир сатып берүү үчүн акча алып алдап жүргөн Х.С. аттуу аялдын үстүнөн арызданган.

“Ал аял ага батирдин ээси катары таанышкан жана кыймылсыз мүлктү бөлүп төлөө жолу менен сатууга аракет жасаган. Шектүү 5 миң АКШ долларын алдын ала алып, ошол бойдон качып кеткен. Бул арыз Кылмыштарды жана жоруктарды катооо Бирдиктүү Реестрине катталган жана оперативдүү иликтөөлөрдөн соң “Көз боемчулук” беренеси менен 36 жаштагы Х. С. Аттуу айым колго түшүрүлгөн. Азыр ал №1-СИЗОго киргизилди, иш сотко чейинки өндүрүшкө алынды”,-деп айтылат маалыматта. Ошогндой эле шаардык милиция аталган шектүү айымдан жабыркагандар болсо 0554102935, 0990102324 жана 102 номуруна чалып арыз-даттанууларды берүүсүн суранат.

Ала-Букадагы чек ара чыры тынчыды

Бишкек. 6.01.20. informator.kg

Ала-Бука районунун Көк-Таш аймагындагы Ак-Курча участогундагы чек ара чыры тынчып, абал турукташты. Бул боюнча Кыргызстандын Мамлекеттик чек ара кызматы кабар таратты.

Анда,  6-январда кыргыз жарандары менен Өзбекстандын чек арачыларынын ортосунда чыр чыгып, коңшулардын аскер кызматчылары эскертүү ирээтинде асманга бир нече жолу ок чыгарганы, пикир келишпестиктен эч ким жабыркабаганы, окуя кыргыз жарандарынын малы такталбаган чек ара тилкесине жайылып киргенден улам чыкканы, натыйжада эки тараптын жергиликтүү бийлик өкүлдөрүнүн кийлигишүүсү менен чыр жайгарылганы айтылат.

Ал эми бул окуя боюнча соцтармактарда төмөнкүдөй тасмалар тарады:

Бүгүнкү абал.. Ала-Бука району Көк-Таш айылы.

Опубликовано Эрнистом Атабековым Понедельник, 6 января 2020 г.

Австралиянын Өкмөтү өрттүн кесепетин жоюуга 1,39 млрд. $ бөлөт

Бишкек. 6.01.20. informator.kg

2020-жылдын 5-6-январь күндөрү аптаптуу ысык каптап, өрт күчөгөн Австралияда жамгыр жаап, бул кабар дүйнө жүзүн кубантты.  Анткен менен өткөн жылдын октябрынан берки жалбырттаган кызыл жалындан улам 6 миллион гектар токой аянтынан айрылган Австралияда өрттүн кайрадан күчөө ыктымалдыгы барын айткандар да бар.

Ал арада Премьер-министр Скотт Моррисон аба ырайынын өзгөрүшү менен бирге өрттү токтотуу аракети да күчтөндүрүлгөнүн, Өкмөт жакынкы 2 жыл ичинде тилсиз жоодон жабыркаган жаратылышты, чарбаларды калыбына келтириүү үчүн 1,39 млрд. доллар бөлүүнү карап жатканын ММКларга билдирген.

Анын айтымында, Австарлиянын бийлиги азыр өрт жалмап кеткен фермаларды, муниципиалдык мекемелер менен инфраструктураны калыбына келтирүү үчүн колдо бар ресурстун баарын жумшаганга даяр турат.

Эске сала кетсек, бул каргашадан жалпысынан 24 адам көз жумуп, флора менен фаунада жашаган 8 миң коал жана миллиондогон башка жаныбарлар өлүмгө учурады. Жүздөгөн асыл тукум мал чарбалары да кызыл жалындын кучагында талкаланды.

Кыргызстандын Улуттук Банкынын алтын-валюталык резерви 2 миллиард 417 долларды түздү

Бишкек. 6.01.20. informator.kg

Быйылкы жылдын башында Кыргызстандын Улуттук Банкынын алтын-валюталык резерви 2 миллиард  417 долларга жетти.  Бул тууралуу Улуттук Банктын төрагасы Толкунбек Абдыгулов КРнын Президенти Сооронбай Жээнбековго жолуккан маалда айтты.

Төраганын айтымында, жогорудагы резервдик көрсөткүч  акыркы беш жылдагы эң жогорку чек болуп эсептелет жана бул акыркы жылы өлкөдөгү банк системасынын активдери 25 миллиард сомго же 11% көбөйгөнүн тастыктап турат. Ал ошондой эле «Керемет» банкы аркылуу бюджеттик кызматкерлерге 1 миллиард 54 миллион сомго турак жай алуу үчүн насыя бергенин да өлкө башчысына билдирип өткөн. Өз кезегинде, Сооронбай Жээнбеков төлөм системаларын, санариптик валютаны жөнгө салуу жаатында мыйзамдарды жакшыртууну жана финансы тармагында заманбап технологияларды киргизүүнү тапшырды.

Кочкордо ур-токмоктон 36 жаштагы келин каза тапты

иллиюстрациялык сүрөт

Бишкек. 6.01.20. informator.kg

Кочкор районунда ур-токмоктон улам 36 жаштагы келин өмүрү менен кош айтышкан. Бул тууралуу Нарын ИИБсинен кабарлашты.

Алдын ала маалыматтарга караганда, 2020-жыл жаңырган 1-январь таңга маал Жаңы-Жол айылына  тез жардам чакыртылып,  келген доктурлар айылдагы жашоочулардын биринин үйүнөн өмүрүн сактап калууга кеч болуп калган келинге кез келишкен. Дароо жергиликтүү милиция бөлүмүнө кабарланып, укук коргоо органдары окуя болгон жерге барышкан.

“Тилекке каршы, өлүмгө учураган аялдын жүзүнөн кан агып, ур-токмоктун белгилери байкалгандыктан, милиция териштирүү иштерин баштаган. Оперативдик-иликтөө иштеринен кийин каза болгон А.У. аттуу аялдын жолдошу алардын ортосунда чыр чыкканын, ал эки жолу муштуму менен колуктусун бет талаштыра чаап, башка тээп жибергенин мойнуна алган.  Учурда сотко чейинки өндүрүш иши жүрүп жатат. Каза болгон келиндин 2 баласы болгон”,-деп айтылат милиция тараткан маалыматта.

Айсулуу Тыныбекова балбан айымдардын сап башына чыкты

Бишкек. 6.01.20. informator.kg

Кыргызстандык спортчу,  кыз-келиндер арасындагы күрөш спорту боюнча Дүйнө чемпиону Айсулуу Тыныбекова Дүйнөлүк рейтинг боюнча айымдар арасында биринчи сапка чыкты. Бул тууралуу UWWтин сайтынан көрүүгө болот.

Жаңырган жаңы 2020-жылдагы рейтинг өз ичине 2019-жылдагы Нур-Султанда өткөн эл аралык мелдештин жыйынтыгынын камтып, анда кыз-келиндер арасында 62 кг. Салмак боюнча алтын медаль тагынган Айсулуу Тыныбекова саптын башына чыккан.

Спорт адистери бул рейтинг алдыдагы Дүйнөлүк Олимпиадага катыша турган күчтүү спортчулардын салмагын арттырып тураарын айтышат.

Балыкчы-Жел-Арык поезд каттамында авария болду. Министр Ж. Бейшенов жөнөп кетти

Бишкек. Informator.kg

Балыкчы-Жел-Арык темир жол участкасында жүк ташуучу поезд аварияга учурап, 10го чукул көмүр жүктөлгөн вагон рельстен чыгып кулаганы кабарланды.

Бул тууралуу маалымат тараткан “Кыргыз Темир жолу” ишканасы Балыкчы-Бишкек поезд каттамы токтотулганын, авария болгон жерге КРнын транспорт жана жолдор министри Жанат Бейшенов баштаган жооптуу кызматкерлер жөнөп кеткенин кошумчалады.

Азырынча кырсык эмнеден улам келип чыкканы белгисиз, turmush.kg сайты жарыялаган сүрөттөрдө бир канча вагон темир жолдон чыгып чыгып кыйшайып жатканын көрүүгө болот.

Кыдырбаев Кырккелди Жогорку соттун судьялыгына шайланды

Бишкек. Informator.kg

Бүгүн, Жогорку Кеңештин жалпы жыйынында депутаттар Жогорку соттун Конституциялык палатасынын бош турган судьялык ордуна талапкерди шайлоону карашты. Анда Президенттик аппарат тарабынан сунушталган талапкер Кыдырбаев Кырккелди Жумалиевич Жогорку соттун  Констициялык палатасынын судьялыгына Президенттин ЖКдагы өкүлү Курманбек Дыйканбаев тарабынан сунушталып, натыйжада 52 добуш менен шайланды.

Ал буга чейин Президенттик аппараттын кечирим берүү комиссиясынын башчысы болуп эмкектенип келген.