Экономика

Экономика

Ат-Башыда эт комбинатынын курулушу башталды

Бишкек. 27.06. 20 informator.kg Ат-Башы районунда эт комбинатынын курулушу башталды. Бул тууралуу жергиликтүү “Жанар и Бек” ЖЧКсынын жетекчиси Бейшен Абышев билдирди.

Анын айтымында, суткасына 15 баш бодо, 50 баш майда жандыкты сое турган бул орто эт комбинатынын курулушуна бүгүн капсула салынган.

“Райондун аксакалдары, активдери, аким Нурбек Сатаров, облус губернатору Эмил Алымкулов, катышуусунда курулушка капсула салынды. Буюрса, быйылкы жылдын октябрь-ноябрь айларында ишке берилет”,-дейт ал.

Ал эми эт комбинаттын жетекчилеринин бири Руслан Өмүралиев болсо комбинаттын курууга көп жылдан бери долбоор жазылып, каржы булактарынан колдоо табылбаганын, акыры Кыргыз Өкмөтү тарабынан Аймактарды өнүктүрүү долбооруна каралган 2 млрд. сотунан 8 млн. сом биринчи этабына РСК-банкы аркылуу бөлүнүп берилгенин айтты.

“Комбинатка суу, электр жарыгын алып келдик, эми негизги этап мал саюла турган цехтин куруу башталды. Мал киндиктүү Ат-Башы районунда малды тирүүлөй сатпай, анын даяр продукция катары сунуштасак деген ниетибиз ишке ашканы турат. Албетте, долбоор толук кандуу ишке ашуу үчүн 16 млн. сом талап кылынат. Калган каржы боюнча да иш алып барабыз”,-дейт ал.

Дарыгерлердин маянасы кандай тартипте төлөнөт? – жооп

24-июнь 2020/informator.kg-

Коронавирус жуккан бейтаптар менен иштеген медицина кызматкерлерине кошумча айлык акы үч ай үчүн төлөнүп берилген. Эгерде кайсы бир кызматкерге кошумча акча тийбесе, бул үчүн ошол медициналык жайдын жетекчиси жооптуу. Бул тууралуу 23-июнда вице-премьер-министр Аида Исмаилова билдирди. Анын айтымында, мамлекет кепилдеген айлык маяна үзгүлтүксүз төлөнүп берилүүдө, коронавирус шартында иштегендерге кошумча акча да төлөндү:
“Биринчиден, кепилденген айлык маянаны төлөп берип жатабыз. Экинчиден, оорунун очогунда иштеген медицина кызматкерлерине кошумча төлөм март, апрель жана май айлары үчүн депозиттик эсептерине которуп бергенбиз. Стационарда иштеген факт түрүндөгү бир күн үчүн дарыгерлерге 2300 сом, орто медперсоналга 2000 сом жана кенже медперсоналга 1800 сом төлөнүп берилиши керек. График боюнча иштеген ар бир саат үчүн дарыгерлерге 100, орто медперсоналга 90, кенже медперсоналга 80 сом төлөнүп берилет. Ал эми “Тез жардам” кызматында иштегендерге оору жуккан ар бир бейтап үчүн доктурга 600, орто медперсоналга 500 жана кенже медперсоналга 400 сом каралган”.
Кыргызстанда 18-марттан 23-июнга чейин коронавирус 3519 адамга жукту, алардын 41и каза тапты, 2054ү айыгып чыкты.
Оору жуккандардын 604ү медицина кызматкерлери, алардын экөө каза тапкан.
Өкмөттүн чечимине ылайык, илдет жуккан медицина кызматкерлерине 200 миң сом, ал эми каза болгондорго 1 миллион сом кенемте төлөнүп берилери айтылган.
Кепилденген айлык бюджеттен төлөнөт, ал эми кошумча маянаны өкмөт Саламаттык сактоо министрлигинде коронавирус башталганда ачылган атайын эсепке элден түшкөн акчадан төлөп берип жаткан.
Элден чогулган акчаны бөлүштүрүү менен атайын комиссия алектенип жатат. Комиссиянын акыркы жыйынында чогулган соңку 4,5 миллион сомдун баарын ооруканаларга медициналык жеке коргонуу каражаттарын сатып алууга жумшоо чечими кабыл алынган.

АКШ жумуш визаларын берүүнү убактылуу чектейт

23-июнь 2020/informator.kg-

Кошмо Штаттардын президенти Дональд Трамп айрым чет өлкөлүк жарандарга, анын ичинде жогорку квалификациядагы адистерге АКШга кирүүгө убактылуу тыюу салган жаңы буйрукка кол койду.Бул чечим АКШда коронавирус пандемиясынан улам пайда болгон массалык жумушсуздукка каршы күрөшүү максатында кабыл алынды.22-июнда кол коюлган буйрук жыл соңуна чейин күчүндө калат жана анын кесепети 525 миңдей адамдын грин картасына тийиши мүмкүн.Жаңы чектөөлөргө жогорку квалификациялуу адистерге берилчү H-1B визасынын ээлери, убактылуу жумуштарда эмгектенген H-2B жана J-1 визаларынын ээлери жана ошондой эле L-1 визасы менен АКШга барып иштеп жүргөндөр кабылат.Май айында АКШда жумушсуздуктун деңгээли 13,3 пайызга өскөн. Жыл башында бул көрсөткүч 3,5% болчу. Ишсиз калган америкалыктардын саны өткөн айда 21 миллионго жетти.Бостондогу Федералдык резервдик банктын президенти Эрик Розенгре 22-июнда билдиргендей, жылдын экинчи жарымы күтүлгөндөн дагы оор болушу мүмкүн, анткени коронавирустун жайылуусу жетиштүү түрдө ооздуктала элек.

“Манас” аэропорту азырынча эл аралык каттамдарга ачылбайт

21-июнь 2020/informator.kg-

Коронавируска каршы республикалык ыкчам штабдын чечими чыкмайынча, “Манас”, Ош аэропорттору эл аралык каттамдарды кабыл албайт. Бул маалыматты аталган аэропорттун коомчулук менен байланышуу бөлүмүнүн кызматкери Алия Курбанова билдирди:
“22-марттан тартып өлкөгө өзгөчө кырдаал киргизилип, чек аралар жабылган. Бул режим азырынча алына элек, чек аралар ачыла элек. Ошондуктан, республикалык штабдын расмий уруксатысыз эл аралык каттамдар кабыл алынбайт”.
Алия Курбанованын маалыматына караганда, өзгөчө кырдаал учурунда аэропортко кыргызстандык жарандарды алып келген жана өз жарандарын алып кетүү үчүн келген чартердик каттамдар гана конууда.
Коронавируска каршы республикалык ыкчам штабдын чечими менен 5-июндан тартып ички аба каттамдарын жүргүзүүгө уруксат берилген.
Айрым маалымат каражаттары Түркиянын “Turkish Airlines” авиакомпаниясы 23-июндан тартып, бир катар өлкөлөргө каттамын жандантарын жазышты. Арасында Кыргызстандын борбору Бишкек шаарына 23-июндан тартып, жумасына үч ирет каттам болору кабарланган. Маалыматты компаниянын Бишкек кеңсесинен тактоого мүмкүн болгон жок.
Түркия коронавирус пандемиясына байланыштуу эл аралык аба каттамдарын 28-марттан тартып токтоткон. 16-майдан баштап 31 өлкөнүн, анын ичинде Кыргызстандын жарандарына дарылануу үчүн өлкөгө кирүүгө уруксат берилген.

Маалыматтык технологиялар комитетинин төрагалыгына Алтынбек Исмаилов келет

Маалыматтык технологиялар жана байланыш комитетинин төрагалыгына Алтынбек Исмаилов сунушталды. Ал буга чейин Жогорку технологиялар паркынын башкармалыгынын жетекчиси болуп иштеп келген.

Дастан Догоев Маалыматтык технологиялар жана байланыш мамлекеттик комитетинин төрагалыгынан 10-июнда кетти.

Кыргызстандын бюджетинин дефицити 13 млрд 352 млн сомду түздү

2020-жылды 5 ай ичинде кирешелер 40 млрд 996 млн сом суммасына аткарылды, бул 2019-жылдагы көрсөткүчкө карата 11 млрд 199 млн сомго аз. Бул туралуу КР финансы министринин орун басары Марлен Амандыков маалымат жыйында билдирди.Анын айтымында, 5 айдын жыйынтыгы боюнча республикалык бюджеттин дефицити 13 млрд 352 млн сомду түзгөн. Ал эми бул мезгилдеги чыгашалар 54 млрд 348 млн сомду түзүп, өткөн жылга салыштырмалуу 2 млрд 867 млн сомго көбөйгөн.

«Бюджеттин дефицитин каржылоо булактары боюнча аткарылышы 23 млрд сомду түздү. Алардын ичинен 4 млрд 700 млн сом бул ички каражаттар, 18 млрд 382 млн сом тышкы булактар. Анын ичинен 17 млрд сом Эл аралык Валюта фондунан алынган насыя. Бюджеттик каражаттардын калдыгы 9 млрд 750 млн сомду түздү. Бюджеттик каражаттар 5,5 млрд сом жана атайын каражаттар 4 млрд 200 млн сом», — деп белгиледи Марлен Амандыков.

Асрандиев: Бардык социалдык төлөмдөр, пенсия жана жөлөк пулдар убагында берилет

12-июнь 2020/informator.kg-

Бул маалыматты вице-премьер-министр Эркин Асрандиев 11-июнда, брифингде билдирди. Анын айтуусунда, мамлекеттик бюджеттин абалы оор экенине карабай, социалдык милдеттенмелер мөөнөтүндө аткарылат.
“Өкмөт пенсия, жөлөк пул жана мамлекеттик органдардын айлык акыларын өз учурунда берип жатат жана мындан ары дагы бул төлөмдөр өз убагында берилет”, – деди вице-премьер-министр.
Эркин Асрандиев жыл башынан берки беш айда бюджетке 14 млрд. сом түшпөй калганын белгилеп, ишкерлерди салыктан бошотуу мындан да көп жоготууларга алып келерин кошумчалады.
Анын сөзү боюнча, өкмөт ишкерлерге жеңилдетилген тартипте каржылоо аркылуу колдоо көрсөтүүнү чечти. Ишкерлерди каржылоо программасы 22-25-июндан тарта ишке кирет. Учурда ага катышуучу банктарды аныктоо процесси жүрүп жатат.
Коронавирус пандемиясынан улам быйыл мамлекеттик бюджетке 30,8 млрд. сом түшпөй калуусу күтүлүп жатканын өкмөт маалымдап келет. Анын кенемтесин эл аралык донорлордон алынуучу акча менен толтурулаары кабарланган.
Каржы министри Бактыгүл Жээнбаеванын парламентте билдиргенине караганда, Кыргызстан Эл аралык валюта фонду, Дүйнөлүк банк, Азия өнүктүрүү банкы, Европа өнүктүрүү банкы жана башка каржылык уюмдардан, өнүккөн өлкөлөрдөн жалпы 500 млн доллардын айланасында насыя алууну сүйлөшкөн. Анын ичинен азыраак бөлүгү – грант.

«Кыргыз унаа курулуш» заводунун курулуш иштеринин биринчи этабы аяктап, өз ишин баштады

10-июнь 2020/informator.kg-

Президент Сооронбай Жээнбеков 10-июнда электробустарды чыгара турган автозаводдун иши менен таанышты. Президенттик аппараттын маалыматтык-саясат бөлүмү билдиргендей, «Кыргыз унаа курулуш» деп аталган заводдун курулуш иштеринин биринчи этабы аяктап, өз ишин баштады. Анын ишке кириши менен 500гө чейин жумуш орундары түзүлгөн. Ал эми курулуш иштеринин экинчи этабы бүткөрүлүп, завод толук ишке киришкенде, жумуш орундарынын саны 5 миңге жетет.
Заводдо жеңил жана оор өнөр жай, айыл чарба тармагы үчүн комплекттөөчү шаймандар менен техникалар өндүрүлүп жатат, трансформаторлор менен акылдуу эсептегичтер иштелип чыгып, текшерүүдөн өтүүдө.Ошондой эле Кыргызстандан чыгарыла турган биринчи электробус даярдалууда.
Ата мекендик электроэнергетикалык тармагынын чоң потенциалын эске алуу менен ошондой эле чакан жана чоң гидроэлектрстанциялар үчүн зарыл болгон жабдуулар, анын ичинде гидротурбиналар менен генераторлор чыгарылууда.
Курулуш иштеринин биринчи этабына болжол менен 20 миллион доллар сарпталган. Завод Европа жана Жапониянын заманбап жабдуулары менен жабдылганы айтылды.

УКМК: коррупциядан мамлекет 10 миллиард сомдон ашык зыян тартты

5-июнь 2020/informator.kg-

Кыргызстанда 2018-жылдан бери коррупциялык иштерден мамлекетке келтирилген зыяндын көлөмү 10 миллиард 424 миллион 379 миң сомго жетти. Анын бир миллиард 220 миллион 42 миң сому өндүрүлүп, Бирдиктүү депозиттик эсепке 477 миллион 900 миң сом которулду. Мындай маалыматты Улуттук коопсуздук боюнча мамлекеттик комитеттин (УКМК) Антикоррупциялык кызматынын жетекчисинин орун басары Талантбек Кожонов 5-июнда парламенттеги «Республика – Ата Журт» фракциясынын жыйынында билдирди:
«Жалпысынан 2018-2020-жылдар аралыгында коррупция боюнча 940 кылмыш иши козголду. Анын 410у – кызмат абалынан кыянат пайдалануу фактысы, 104ү «Пара талап кылуу», «Пара алуу», 35и «Коррупция» беренелери менен козголуп аныкталган. Коррупциялык иштердин дээрлик көбү ички иштер органдарында – 106, Мамлекеттик каттоо кызматында – 104, жергиликтүү өз алдынча башкаруу органдарында – 94, Мамлекеттик бажы кызматында – 59, Мамлекеттик салык кызматында – 44, сот органдарында – 37 кылмыш аныкталган».
Талантбек Кожоновдун айтымында, соңку үч жыл ичинде коомчулукта резононс жараткан иштер да ашкереленди.
«Эң чоңу ЖЭБ боюнча коррупцияга байланыштуу. Бир топ мамлекеттик кызматкерлер соттолуп, алардын иши Жогорку сотто каралып жатат. Транспорт жана жолдор министринин орун басары 50 миң доллар менен кармалды»​, – деди ал.
«Республика – Ата Журт» фракциясы 5-июндагы жыйынында фракция депутаттары сунуш кылып, кабыл алынган мыйзамдардын жана 2018-2020-жылдар аралыгындагы чечимдердин аткарылышын талкуулады. Аларды ишке ашыруу багытында өкмөт өкүлдөрүнүн маалыматы угулду.

Ысык-Көл туристтерге качан эшигин ачат?

28-май 2020/informator.kg-

Облус башчысы талап күчтүү болгондуктан туристтерди кабыл алчу мекемелердин даярдыгы жылдагыдан жакшы экенин белгиледи.
Быйыл Ысык-Көлдө ички туризм жанданып,өзүбүздүн жарандар көп келет деп күтүп жатабыз.Мындай оюн өкмөттүн Ысык-Көл облусундагы өкүлү Акылбек Осмоналиев брифинг учурунда билдирди .
Анын айтымында туристтерди кабыл алуу талаптары боюнча атайын долбоор иштелип чыккан.Ал маданият,маалымат жана туризм министрлигинин алдындагы Туризм департаментинин алдына жөнөтүлгөн.
“Департамент карап чыккандан кийин долбоорду Саламаттыкты сактоо министрлигине жөнөтөбүз .Алардын жактыруусун алган соң туризм тармагы түрлөрүнө жараша ачыла баштайт.Даярдыктар жылдагыдан жакшы .Анткени талап күчтүү .”-деди Осмоналиев.