Экономика

Экономика

Равшан Сабиров, КРнын вице-премьер министри: “Өкмөт үчүн өндүрүштү, экспорттук потенциалды көтөрүү негизги приоритеттердин бири”

Бишкек.18.01.21 informator.kg “Кыргыз өкмөтү үчүн өлкөнүн өндүрүш тармагын, экспорттук потенциалды көтөрүү негизги приоритеттердин бири. Биз бул тармакка колдон келген колдоону көрсөтөбүз”. Бул тууралуу КРнын вице-премьер министри Равшан Сабиров “Бишкек” Эркин Экономикалык аймагынын генералдык директору Кудрет Тайчабаров менен жолукканда билдирди.
Ишканадан өндүрүлүп чыгып жаткан сапаттуу продукциялар менен көргөзмө борборунда таанышып жатып, өкмөт башчынын орун басары Кыргызстандагы эркин экономикалык аймактардын өнүгүшүнө жеткиликтүү шарттар түзүлө турганын айтты.


“Бүгүнкү жыйында биз негизинен эки маселени, ЭЭАлардын аймагына өндүрүшкө керектүү болгон сырье жана жарак-жабдыктарды үчүнчү өлкөлөрдөн бажы төлөмдөрүсүз алып кирүүдө жана өндүрүлгөн товарларды сыртка сатууда депозиттик эсепке каражат салып, кепилдендирүү боюнча маселелерди угуп, аны чечүү жана жалпы эле эркин экономикалык аймактарды өнүктүрүү стратегиясын иштеп чыгуу боюнча топ түзүп, иешелүү ведомстволордун өкүлдөрү менен бирге иштешүү тапшырмасын койдук. Ошону менен бирге эле өндүрүшчүлөргө жаңы жумушчу орундарды ачуу жана өндүрүштүн көлөмүн арттыруу үчүн Өкмөт тараптан жетиштүү жардам берип, колдоо көрсөтүү керектиги тууралуу кабардар болдук. Биз ар ай сайын атамекендик продукция чыгаруучулар менен тегерек стол уюштуруп, келип чыккан маселелерди мүмкүн болушунча тез арада чечүү, мыйзамдык базасын жакшыртуу боюнча иштейбиз”,-деди министр Равшан Сабиров.
Өз кезегинде, “Бишкек” ЭЭАсынын генералдык директору Кудрет Тайчабаров эң негизгиси ишкана -ички жана сырттан келген инвесторлор үчүн өндүрүш аянтчасы катары иш алып барып, экспортко багыт алган өндүрүштүн локомативи катары ишмердик жүргүзүүсү керектигин, бирок, улам ЭЭАлар тууралуу мыйзамдар өзгөртүүгө дуушар болуп жатып, азыр эркин экномикалык аймактын ичинде иштеген өндүрүш менен сырттагы жеке менчик аймактардагы өндүрүшчүлөрдүн айырмасы дээрлик болбой калганын баяндады.
“Равшан Азатович, албетте, азыр өлкөдө абал түшүнүктүү, өкмөткө каражат керек, салык, бажы кызматтары көбүрөөк төлөмдөрдү казынага буруунун аракетинде. Ошентсе да, ЭЭАлардагы субьектилерге мамиле, мыйзам башкача болушу керек. Анткени, биздеги өндүрүшчүлөр, сырьего бажы төлөмдөрүнөн бошотулганы менен, алар канчалык көп жумушчу орундарын түзсө, экспортко товар чыгарса, салыктан көбүрөөк пайда, башкысы, “Кыргызстанда өндүрүлгөн” деген брендди жайылтып, ЕАЭБдин жана андан тышкаркы өлкөлөрдүн базарларынан Кыргызстандын өндүрүшчүлөрүнө орун таап, мамлекеттин кадырын арттырып жатат”,-деди К. Тайчабаров.
Жыйынтыгында, Өкмөт тарабынан “Бишкек” ЭЭАсынын жетекчилиги ЭЭАлардын өнүгүү стратегиясын тиешелүү министрликтер менен бирге ишкана иштеп чыгып, өкмөттүн кароосуна сунуштамак болду.

Экс-премьер Кубатбек Боронов финполго суракка чакыртылды

Бишкек. 11.01. 12 informator.kg  Кыргыз Республикасынын мурдагы Өкмөт башчысы Кубатбек Боронов финполго суракка чакыртылды. Бул тууралуу аталган органдан тастыкташты.

Андагы маалыматтар боюнча, мурдагы өкмөт башчысы 2020-жылдагы “Коронавирус” пандемиясы менен күрөшүүдө Өкмөткө келип түшкөн материалдык жардамдардын бөлүштүрүлүшү, сырттан кирген каражаттар жана каржылык маселелер боюнча суроолорго жооп берет.

К. Боронов финполицияга эртең 12-январда күндүзгү саат 11:00гө чакыртылган.

Садыр Жапаров: “Акыл-эс, абийир жана чын жүрөк менен шайлоону таза өткөрүү керек!”

Бишкек . 08.01.21. informator.kg

Кыргыз Республикасынын
Президенттигине талапкер
Садыр Жапаровдун

КАЙРЫЛУУСУ

Урматтуу кыргызстандыктар!
Кымбаттуу достор!
10-январь күнү биз, өлкөбүздүн жашоосундагы эң маанилүү чечимди кабыл алабыз!
Бул күн – биз үчүн өлкөдө көптөгөн жылдардан бери кыйынчылыктардан арылууну көздөгөн, асыл тилекти орундатуудагы эң маанилүү күн болуп калмакчы!
Баарыңыздар шайлоого келиңиздер!
Ар бириңиздер, өз тандооңуздарды жасайсыздар!
Кандай өлкөдө жашайсыздар – чечим Сиздерде!
Кандай бийликти каалайсыздар? Күчтүү бийликтиби? Адилет жана элдик, бардыгыбыз үчүн жоопкерчиликти ала турган бийликтиби?
Же мыйзамсыздык, коррупция, жоопкерчиликсиздик жана саткынчылык өкүм сүргөн жашоого кайра кайтып баргыңыздар келеби? Башаламандык менен жакырчылыктан кутулгуңуздар келбейби?
Ар бирибиз – өз тандообузду жасашыбыз керек!
Биздин эртеңки келечек кандай болот – ар бирибиз жоопкербиз! Өлкөнүн тагдырын чече турган жана чечкиндүү аракетке бара алган адамды тандап алууга, биз гана укуктуубуз!
Элдин тагдыры, балдарыбыздын тагдыры, эртеңки келечек – ар бирибиздин колубузда!
Сиздер, өз жүрөгүңүздөр менен, акыл-эс жана абийирди бийик коюп, акыйкат тандоо жасоого тийишсиздер!
Сиздердин ар бириңиздер, мен да, бардыгыбыз жаңыланууну күтүүдөбүз!
Биз, жашообузду жаңы барактан баштоого татыктуубуз!
Биздин мамлекетти ондогон жылдар бою каалагандай тоношуп, талкалап келген эски коррупциялык түзүмдөргө жол бербеңиздер!
Биздин жаңыланууга болгон укугубузду тартып алгысы келгендерге ишенбегиле!
Биз, жарандарыбыз үчүн ак иштей турган бийликти тандоого мүмкүнчүлүк алдык!
Алдыбызда турган сыноолордон ынтымак менен бирге өтө алабыз.
Кымбаттуу кыргызстандыктар!
Алдыдагы жаз айларында бизди олуттуу сыноолор күтүп турат.
Биз, кризистен чыгып, жаңылануу жана гүлдөп өнүгүү жолуна түшүү үчүн болгон күч-аракетибизди жумшашыбыз керек!
Шайлоодо ким утуп чыкпасын, биз жаңы шайланган президенттин тегерегине чогулуп, аны колдоого алуубуз абзел!
Эртең кандай өлкөдө жашайбыз, ар бирибиз жоопкербиз!
Шайлоого келиңиздер!
Өзүңүздөрдүн жана балдарыңыздардын келечеги үчүн, мекенибиздин тагдыры үчүн добуш бериңиздер!

Аткаруучу: « informator.kg » ; дареги: Кыргыз Республикасы, Бишкек ш., Кулатов.көч 8.
Буюртмачы: Төлөгөнова Аида Бейшеналиевна, Кыргыз Республикасынын Президентинин кызматына талапкер Жапаров Садыр Нургожоевичтин каржы маселелери боюнча ыйгарым укуктуу өкүлү.
Нускасы: 1. 2021-жылдын 08-январда даярдалды.
Кыргыз Республикасынын Президентинин кызматына талапкер Жапаров Садыр Нургожоевичтин шайлоо фондунан каржы маселелери боюнча ыйгарым укуктуу өкүлү Төлөгөнова Аида Бейшеналиевна тарабынан төлөндү (күб. № 35, 16.11.2020-ж).

Садыр ЖАПАРОВ: “Орус тилинин макамын сактап калуу менен кыргыз тилин үйрөнүүнү күчөтүү керек”

Бишкек. 07.01.21. informator.kg Садыр Жапаровду өлкө аймагынын тургундары кызуу колдоого алышууда. Ал эми борбор калаада жашагандар ага азырынча этият мамиле кылышууда. Анткени Садыр Нургожоевич кыргыз тилинде сүйлөгөндү артык көрөт. Ал өзүнүн маектеринин биринде кыргызча ойлонорун жана кыргызча сүйлөп көнгөндүгүн, бирок зарыл болгон учурда орус тилинде да сүйлөй аларын айткан эле.

Бирок ошентсе да бишкектиктердин маанайына таасир эте турган айрым бир суроолордун башы ачык калганын айта кетели.   

– Садыр Нургожоевич, графигиңиздин тыгыз экенине карабай убакыт бөлгөнүңүзгө ыракмат…

– Сиз суроолоруңузду бере электе Кыргызстандагы бардык православдарды дагы бир жолу эң башкы диний майрамдарынын бири – Иса Пайгамбардын Туулган күнү менен куттуктап койгум келет!  

Кыргызстандагы коом ачык жана максатыбыз бир. Ошондуктан эзелтен калыптанып калган салтка ылайык, бири-бирибиздин майрамдарыбызды дайыма жакшы маанайда, чын дилибизден кубанып белгилеп келебиз.   

Мына ушул бүгүнкү майрамда да көптөгөн православ дининдеги мекендештерибиз өзүлөрүнүн мусулман досторунан “Иса Пайгамбардын Туулган күнү кут болсун!” – деген куттуктоону угушаарын билем. Бизди күчтүү, бекем коом кылган дал мына ушундай руханий биримдик. Мындан ары да ушундай болушу керек!

– Ошентсе да орус тилдүү шайлоочулар Сизди орус тилинде көп сүйлөбөйт деп кабатыр болушууда?

– Мен бул туурасында айткам, дагы бир жолу кайталап коёюн. Мен орус тилин жакшы эле билем, сүйлөй да алам, бирок мен кыргызмын да!? Кыргызча ойлоном, кыргызча сүйлөйм. Негизи менин кайсы тилде сүйлөөрүмдүн мааниси жок, башкысы, аткарып жаткан ишим эмеспи? Мекенчил адам үчүн иштин көзүн таба билүү маанилүү.

Орус тилине келсек, мен анын ролун жана маанисин абдан жакшы билем. Ошондуктан орус тили, мен буга чейин баса белгилеп айткандай, Кыргызстанда расмий макамын сактап кала берүүгө тийиш. Мен орус тилинин макамын басмырлоого жол бербейм. Аймактарда орус тилин окуп үйрөнүүгө болгон муктаждык абдан жогору экенин, бирок мугалимдер жетишпей жатканынан жакшы кабардармын. Бул маселени чечишибиз керек. Ошол эле мезгилде Кыргызстанда жашаган орус тилдүү жарандарыбыз да, кыргыз тилин үйрөнүүсү зарыл деп эсептейм. Бирок бул маселеде кыргыз тилин окутуунун усулу бизде абдан чабал экенин моюнга алганыбыз оң. Ошондуктан бул маселе менен тыгыз иштеп, кыргыз тилин да, орус тилин да окутуу сапатын жаңы деңгээлге көтөрүшүбүз керек.         

– Садыр Нургожоевич, шайлоочулар менен болгон жолугушууларыңызда Сизден Россия менен кош жарандуулук жөнүндө көп жолу сурашты. Бул туурасында оюңуз кандай?

– Бул маселе алиге чейин чечилбей келатканына өкүнөм. Россияда учурда 1,5 миллиондой кыргызстандыктар иштеп жүрүшөт. Аларда кош жарандуулук болсо, туура болмок деп эсептейм. Анткени Кыргызстандын жараны болуп, ошол эле кезде Россия аймагындагы жеңилдиктерден да пайдалана беришмек. Анын үстүнө, алардын ал жакта оокат мүлкү бар, балдары мектепке, бала бакчага барууда. Андыктан мен бул идеяны кош колдоп колдойм жана шайлоодо утуп чыксам, бул маселеге олуттуу киришем..

– Россия жөнүндө кепти уланталы. Аскер базасы жөнүндө коомчулукта көп айтылат. Балким, андан баш тартып койсок кантет?  

– Эч качан! Мунун себебин чечмелей кетейин. Аскер базасы менен аскер кубаты Россияга караганда бизге көбүрөөк керек. Кыргызстан ЖККУнун мүчөсү экенин да унутпаңыз. Биздин чек аралар ЖККУ менен Евразиялык биримдиктин да тышкы чектери болуп саналат. Бул биз үчүн гана эмес, кошуна өлкөлөр үчүн да стратегиялык маселе. Албетте, биз чек араларыбызды экстремисттик жана террордук күчтөрдүн мүмкүн болгон кысымынан эч кимдин жардамы жок эле өз күчүбүз менен коргоону камсыздай алсак жакшы болмок.

Жалпысынан Россия туурасында айта турган болсок, биз бул өлкө менен болгон кызматташтыктын потенциалын толук колдоно албай жатабыз деп эсептейм. ЕАЭБ жана ЖККУнун багыттары боюнча көптөгөн пайдалуу долбоорлор баягы эле бюрократиялык тосмолордон, чиновниктерибиздин иштин көзүн таба албаганынан жана жалкоолугунан токтоп калган. 

Биз аскерий же экономикалык кызматташтык гана эмес, башка көп багыттар боюнча, маселен, жаңы өндүрүштөрдү ишке киргизүү, маданий демилгелер, билим берүү жана илимий долбоорлор туурасында сүйлөшсөк болот. Алтургай, биз евразиялык мейкиндиктин катышуучусу катары Россия менен гана эмес, евразиялык башка өлкөлөр менен да ушул багыттар боюнча иштөөгө тийишпиз. Мындан улам биздин алдыбызда чети оюла элек жумуш талаасы турат, эмне деген мүмкүнчүлүктөргө, келечектүү иштерге жол ачылууда. Эң башкысы – кара баштын эмес, элдин, урпактардын кызыкчылыгын ойлоп иш кылуубуз зарыл. Ошондо баары ишке ашат!

Аткаруучу: «Informator.kg» ; дареги: Кыргыз Республикасы, Бишкек ш., Кулатов көч.8.

Буюртмачы: Төлөгөнова Аида Бейшеналиевна, Кыргыз Республикасынын Президентинин кызматына талапкер Жапаров Садыр Нургожоевичтин каржы маселелери боюнча ыйгарым укуктуу өкүлү.

Нускасы:1. . 2021-жылдын 07-январда даярдалды.

Кыргыз Республикасынын Президентинин кызматына талапкер Жапаров Садыр Нургожоевичтин шайлоо фондунан каржы маселелери боюнча ыйгарым укуктуу өкүлү Төлөгөнова Аида Бейшеналиевна тарабынан төлөндү (күб. № 35, 16.11.2020-ж).

Сырткы карыздан кутулуу үчүн Өкмөткө Адыл Асанов 1 млн. которгон

Бишкек. 7.07. 21. Informator.kg  Кыргыз өкмөтү сырткы карыздан кутулуу үчүн калктан жардам сурап, атайын каржы министрлигине эсеп ачкан болчу. Эсепке 1 млн. 29 миң сом акча түшкөнүн, анын 1 млн. 22 миң сому жарандардан, 27 миң сому ишканалардан келип түшкөнүн министрликтен кабарлашты.

Маалыматка таянсак, өткөн жылдын акыркы күнү же 31-декабрда 1 млн. сомду Адылбек Асанов аттуу жаран которгон. Интернеттеги ачык булактарда ал “Артвин” жана “Нурзаман” курулуш компанияларынын жетекичи, ишкер-меценат катары сыпатталат.

Эске сала кетсек, 2021-жылдын 1-январына карата Кыргызстандын тышкы карызы 4 млрд. 180 млн. долларга жеткен.

“Сары Бокеге” издөө жарыяланды

Бишкек. 05.01.2021. informator.kg УКМКнын мурдагы орун басар төрагасы, эл ичинде “Сары Боке” каймана аты бар Болот Сүйүмбаевге УКМК тарабынан издөө жарыяланды. Бул тууралуу башкы коопсуздук органынан кабарлашат.

Андагы маалыматтар боюнча, Б. Сүйүмбаевге экономикалык аткезчилик жана кызмат абалынан кыянат пайдалануу беренеси менен кылмыш иши ачылган.

“Жогоруда айтылган сотко чейинки өндүрүштүн алкагында мурунку орун басар Б.Суюмбаевдин бул кылмышка тиешеси бар же жок экендиги боюнча бир нече жолу суракка жана башка тергөө иш-аракеттерине чакырылган туралуу танылгыс далилдер алынды.

Б.Суюмбаевдин сурака келбей жаткандыгына байланыштуу, КР УКМК тергөө органдары тарабынан Кылмыш-жаза кодексинин 320-беренесинин 3-бөлүмү (кызмат абалынан кыянаттык менен пайдалануу) жана 223-берененсининт 2-бөлүмү (экономикалык кантарбанда) боюнча кылмышка шектүү деген билдирүү берилип, ага издөө жарыяланган.

Б.Т.Суюмбаевдин жүргөн жерин көргөн же билген адамдар УКМК нөөмөт кызматына 0312 66-04-75 же 102 (КР ИИМ нөөмөт бөлүмү) телефон аркылуу кабар берсеңиздер болот. Анонимдүүлүккө кепилдик берилет”,-деп айтылат маалыматта.

Жэк Ма 2 айдан бери дайынсыз жок

Бишкек. 05.01.2021. informator.kg Азиядагы эң бай адамдардын бири, “Alibaba” интернет дүкөндөр түйүнүн ээси Жэк Ма эки айдан бери дайынсыз болууда. Бул тууралуу “Азаттык” жазып, ал акыркы жолу ал Шанхайдагы ири экономикалык жыйынга катышып, анда Кытайдын базар мамилелерин жөндөөчү мекемесин курч сындап сөз сүйлөгөндөн кийин бийлик тарабынан кысым болгонун билдирет.

“Жэк Ма мырзанын 2020-жылдын октябрындагы сынынан соң Кытайдагы ишкердикке көзөмөлдөөчүлөр “Alibaba” компаниясына жана анын кол астындагы “Ant Group” каржылык компаниясына каршы антимонополиялык жактан тергөө ишин баштаган”,-деп билдирет маалымат булагы.

Эске сала кетсек, 2018-жылдын ноябрында “Форбс” журналы Жэк Ма 35,8 млрд доллар байлыктын ээси экенин, ал дүйнөдөгү эң бай 18-киши экенин жазган.

Азиядагы эң бай адам эми Джек Ма эмес… Чжун Шаньшандын байлыгы 77,8 млрд. долларга жетти

Бишкек. 01.01. 2021.informator.kg 2020-жылдын аягындагы Bloomberg басылмасынын миллиардерлер Индекси боюнча Азиядагы эң бай адам  Alibabaнын кожоюну  Джека Ма  болбой калды. Азырынча бул континенттеги ити чөп жеп, иши жүрүшкөн адам бул сууларды жана вакциналарды бөтөлкөгө куюп сатуу өндүрүшүн жолго койгон кытайлык Чжун Шаньшань болууда. Ал бул жылы болуп көрбөгөндөй киреше табуу менен Индиялык Мукеша Амбани менен Джек Маны артка калтырган.

Эсептөөлөр боюнча, Чжун Шаньшандын байлыгы быйыл 77,8 млрд. долларга чаап барып, ал дүйнөдөгү эң бай дегендердин тизмесинде 11-сапка туруу укугуна ээ болгон.

Анын бул ийгилигине өзүнө караштуу эки компаниянын-  Nongfu Spring сууларды жана шириндиктерди куюп сатуучу компаниясы менен  Beijing Wantai Biological Pharmacy Enterprise аталышындагы гепатитке каршы вакцина жана COVID-19 илдетин аныктоочу тесттерди өнүктүргөн компанияларынын акцияларынын өскөнү өбөлгө болгон.

Кара-Кулжа айыл өкмөтүнүн жетекчилиги 2 млн. 750 млн. сомдук зыян алып келген

Бишкек. 01.01. 2021.informator.kg “Кара-Кулжа айыл өкмөтүнүн мыйзамсыз аракети менен мамлекетке 2 миллион 750 сомдук зыян келтирилген”. Бул тууралуу башкы прокуратурадан билдиришти. Анда мындай деп айтылат.

“Ош облусуна караштуу Кара-Кулжа районунун Кара-Кулжа айыл өкмөтүнүн 2009-жылы кабыл алынган мыйзамсыз токтому менен Т.Абакир уулу атындагы стадионго тиешелүү жеринин 816 чарчы метр жер аянты О.Т. аттуу жаранга берилип кеткенин райондук прокуратура аныктаган.

Тергөө маалында белгилүү болгондой, жогорудагы социалдык багыттагы жер тилкенин базар баасы 2 млн. 750 миң сомду түзөт.

Текшерүүнүн жыйынтыгы менен аталган факты Кара-Кулжа райондук прокуратурасы тарабынан Жазык кодексинин 320-бер. (Кызмат абалынан кыянаттык менен пайдалануу) менен КЖБРге катталып, тергөө амалдарын уюштуруу үчүн райондук ички иштер бөлүмүнө тапшырылган”,-деп жазылат.

Ошону менен бирге эле айыл өкмөттүн жерди ажыратып берүү жөнүндөгү мыйзамсыз токтомун, анын негизиндеги мамлекеттик актыны жана соода-сатык келишимин жокко чыгаруу боюнча сотко доо арыздар келтирилип, учурда соттук кароолор жүрүп жатканы кошумчаланат.

Садыр Жапаров: “Биздин саясий көз караштарыбыз ар кандай, бирок максатыбыз бир – Кыргызстандын жаркын келечегин камсыз кылуу”

Бишкек. 13.12. 20. Informator.kg 

№1.

Биздин саясий көз караштарыбыз ар кандай, бирок максатыбыз бир: Кыргызстандын жаркын келечегин камсыз кылуу. Баарыбыз үчүн биздин мамлекеттин жана элибиздин тагдыры баарынан кымбат болууга тийиш. Эң маанилүүсү – өлкөбүздөгү тынчтык, элдин биримдиги жана коомубуздагы коопсуздук.

(С. Жапаровдун сүйлөгөн сөзүнөн 14.11.2020)

Кыргыз Республикасынын президенттигине талапкер Садыр Жапаровдун шайлоо алдындагы “Келечекке кызмат” платформасында анын Кыргызстанды өнүктүрүү боюнча негизги жана пайдубалдуу сунуштары айтылган. Бул процесстер реалдуу натыйжа бере башташы үчүн эмитен конкреттүү кадамдар жасала баштаганын белгилей кетүүгө арзыйт. 

Келечекке кызмат бүгүндөн башталат!

Кыргызстанда конституциялык реформа жүргүзүү зарылдыгы партиялык система өлкөгө саясий ыйкы-тыйкылыктан башка эч нерсе алып келбегенинен улам келип чыккан. Депутаттар талашып-тартышып, өкмөттөгү жана парламенттеги орундарды бөлүштүрүүү менен гана алектенип жатышканда өлкө өнүккөн жок, тышкы күчтөр болсо биздин экономиканы карыздын сазына ого бетер батырып келишти. Саясатчылар телеэкрандан түшпөй калжаңдашып жатканда, элдин ырыскысын жеген кызыл кулактар өзүлөрүнүн элге каршы каршы мыйзамдарын түртүп өткөрүп келишти.

“Дал ушундан улам мен: депутаттардын жамааттык жоопкерсиздиги Кыргызстанды талкалоодо деп билдирем”, – деди Садыр Жапаров.

Конституциянын жаңы редакциясы коомчулуктун кеңири катышуусу менен Контиуциялык кеңешменин ишинин алкагында дагы талкууланат жана жакшыртылат.

“Мен 2021-жылдын 10-январындагы Президентти шайлоо күнү мамлекеттик түзүлүш формасы боюнча: президенттикпи же парламенттикпи деген бир гана суроо боюнча референдум өткөрүүнү сунуштайм.  Андан кийин бүткүл элдин кызыкчылыгына жооп берген, мамлекеттик түзүлүштүн так формасы көрсөтүлгөн Конституциянын долбоорун жалпы элдик талкууга алып чыгуу керек”, – деген сунушун айтты С.Жапаров.

Садыр Жапаров президенттин жоопкерчилиги менен кошо анын ыйгарым укуктарын да күчөтүүнү сунуштайт.

“Мамлекет башчысы мамлекеттин толук кандуу иштеши үчүн – тышкы саясаттан тартып ички чарбалык ишмердүүлүккө чейинки ишине жооп берет. Эми Президент жеке өзү жооп берет” – деп белгиледи ал. 

Шайлоо жаатында сунушталып жаткан өзгөртүүлөр – депутаттардын үчтөн биринен кем эмес бөлүгү мажоритардык система боюнча, калгандары партиялык тизме боюнча шайланат. Эл дайыма конкреттүү адамдарды көрсөтөт, ошондуктан мейли, парламентте мына ошол адамдар отурсун, партиялар болсо квота боюнча өкүлчүлүктү камсыз кылышсын. 

Аткаруучу: « informator.kg» ; дареги: Кыргыз Республикасы, Бишкек ш.,    Кулатов к. 8. Буюртмачы: Төлөгөнова Аида Бейшеналиевна, Кыргыз Республикасынын Президентинин кызматына талапкер Жапаров Садыр Нургожоевичтин каржы маселелери боюнча ыйгарым укуктуу өкүлү.Нускасы:1. 2020-жылдын 23-декабрьда даярдалды. Кыргыз Республикасынын Президентинин кызматына талапкер Жапаров Садыр Нургожоевичтин шайлоо фондунан каржы маселелери боюнча ыйгарым укуктуу өкүлү Төлөгөнова Аида Бейшеналиевна тарабынан төлөндү (күб. № 35, 16.11.2020-ж).