Окуялар

Окуялар

Токтогул районунун тургунунун үйүнөн 541 килограммдан ашык баңгизат алынды

13-октябрь 2020/informator.kg-

Жалал-Абад облусунун Токтогул районунун тургунунун үйүндө жүргүзүлгөн операциянын жүрүшүндө 541 килограммдан ашык баңгизат алынды. Бул тууралуу ИИМдин басма сөз кызматынан билдиришти.

“Атайын операциянын жүрүшүндө 541 килограммдан ашык баңгизат алынды. ИИМдин баңгизаттарды мыйзамсыз жүгүртүүгө каршы күрөшүү кызматы ири көлөмдөгү баңгизаттарды алуу боюнча операцияны ийгиликтүү жүргүздү. Баңгизаттарды саткан адамдарды аныктоо жана кармоого, баңгизаттарды даярдагандардын, ташуучулардын жана сатып алуучулардын ишмердүүлүгүнө бөгөт коюуга багытталган иш-чаранын жүрүшүндө 541 килограммдан ашык баңгизаты табылып алынган. Буга чейин кызматкерлерге Токтогул районунун жашоочусу өзүнүн үйүндө өсүмдүк түрүндөгү баңгизатын даярдап жатат деген ыкчам маалымат келип түшкөн. Аталган факты сотко чейинки өндүрүш ишине алынып, тергөө амалдары жүргүзүлө башталган. Жүргүзүлгөн атайын тергөө иш-чаралардын натыйжасында Токтогул районунун 1982-жылы туулган Ү.М. аттуу тургуну үйүнө тинтүү жүргүзгөн учурда, анын сарайынын ичинен 15 даана канистр, 5 даана бочка, 4 даана ак түстөгү капка салынган күрөң-жашыл түстөгү өзгөчө кендир жыты бар зат табылып алынган. Андан сырткары, ТОЗ-8 үлгүсүндөгү ок атуучу куралы, 12 даана 7.62 калибриндеги октор, гильзалар табылган. Соттук-химиялык экспертизанын корутундусуна ылайык, жогорудагы көрсөтүлгөн заттардын жалпы салмагы 541 килограмм 609 граммды түзгөн, анын ичинен суюктук баңги заты 489 килограмм 760 грамм, марихуана 51 килограмм 849 грамм. Азыркы учурда шектүү Ү. М. соттун чечимине ылайык 2 айга камака алынып, тергөө иш-чаралары жүргүзүлүүдө”, – деп жазылат маалыматта.Булак:Супер инфо

Коронавирус ашыкча салмагы бар адамдар үчүн канчалык кооптуу?

12-октябрь 2020/informator.kg- Ашыкча салмагы бар адамдар коронавируска кабылса каза болуу ыктымалдыгы 48 пайызга жогорулайт. Мындай тыянакты Россиянын саламаттык сактоо министринин орун басары Олег Салагай билдиргенин РИА Новости жазды. Анын айтымында, мындай пикир бүгүнкү турмушта жүргүзүлгөн изилдөөлөргө негизделет. “400 миңдей бейтапка жүргүзүлгөн иликтөөлөр көрсөткөндөй, коронавирус жуктурган семиз адамдар ооруканага түшүп калуу ыктымалдыгы 113 пайыз, жандандыруу бөлүмүнө түшүп калуу ыктымалдыгы 74 пайыз. Ал эми 48 пайызында каза болуу ыктымалдыгы бар”, — деп айтылат маалыматта.

Кара-Кече кени кадимки калыбында иштеп жатат

12-октябрь 2020/informator.kg- Кара-Кече көмүр кени кадимки калыбында иштеп, бир күндө орто эсеп менен 3500 тоннага чукул көмүр сыртка чыгарылууда. Бул туурасында аталган мамлекеттик ишканадан кабарлашты. Маалыматта кен казган жайда абал туруктуу экендиги, калкты камсыздоо үчүн көмүр толугу менен ташылып чыгып жаткандыгы айтылган. Кечээ, 11-октябрда, “Кыргыз көмүр” мамлекеттик ишканасынын директору Канатбек Ашырбаев Кара-Кече кенине барып, иштин жүрүшү менен таанышып келген.

Индияда коронавируска чалдыккандардын саны 7 миллиондон ашты

12-октябрь 2020/informator.kg-Индияда табылган коронавирустук оорулардын саны күнүнө көбөйүүдө. Жалпы оорулардын саны 7,12 миллиондон ашканын Индиянын Саламаттыкты сактоо жана үй-бүлөлүк бакубатчылык министрлиги билдирет. Индия коронавирус менен ооругандардын саны боюнча дүйнөдө экинчи орунда турат. Көпчүлүк учурларда Америка Кошмо Штаттарында 7,76 миллион адамдан коронавирус табылган.

Кыргыз-Кытай чек арасындагы “Торугарт” өткөрүү пункту жабылды

12-октябрь 2020/informator.kg- Аба ырайынын кескин өзгөрүшүнө байланыштуу Кыргыз-Кытай чек арасындагы “Торугарт” өткөрүү пункту жабылды. Бул тууралуу мамлекеттик Чек ара кызматынан кабарлашты. Өткөрүү пункту кытай тараптын демилгеси менен болгон. Анда жүк ташуучу унаалар убактылуу өткөрүлбөйт.

“Дордой Моторс” соода борборунда кызды ур-токмокко алган жаран изделүүдө

12-октябрь 2020/informator.kg- 11-октябрда Д.Сяопин көчөсүндө жайгашкан “Дордой Моторс” базарында белгисиз адам кызды ур-токмокко алганын чагылдырган видео интернетке тараган. Бул факт Бишкек шаарынын Ленин райондук ички иштер башкармалыгынын каттоосуна алынып, Кыргыз Республикасынын Кылмыш-жаза кодексинин 266-беренеси (Бейбаштык) боюнча сотко чейинки өндүрүш иши башталды. Бул тууралуу Ленин райондук ички иштер башкармалыгынын басма сөз кызматынан кабарлашты. “Учурда тергөө иштери жүрүп, белгисиз кишинин турган жерин аныктоо жана камакка алуу боюнча ыкчам-издөө иш-чаралары жүргүзүлүүдө”, – деп билдириштти аталган мекемеден

Жириновский Кыргызстандагы окуяларга таң калуу менен комментарий берди

12-октябрь 2020/informator.kg- Орусиялык саясатчы жана Мамлекеттик Думанын депутаты Владимир Жириновский “Комсомольская правда” радиосуна берген маегинде Кыргызстандагы окуялар жөнүндө комментарий берди. “Кыргыздар өз президенттерин жек көрүшөт. Алар ушуну менен бешинчи президентти айдап жатышат. Аскар Акаев кайда? Ал Москвада жашынып жатат. Курманбек Бакиев кайда? Беларуссияда жашырынып жүрөт. Алмазбек Атамбаев кайда? Түрмөдө жатат. Сооронбай Жээнбеков кайда? Ал дагы качып кетүү аркетин көрүүдө. Бул эмне демократиябы? Көп партиялуу тоскоолдук 4 пайыз, аларда 7 пайыздык чек бар болчу. Азыр ошол 7 пайыздык өтүүчү чек кайда? Мындай дүйнөнүн эч бир жеринде болгон эмес, болбойт дагы. Болуп жаткандардын бардыгын Бишкектеги эле узурпаторлор, диктаторлор ойлоп тапкан. Израилде 1 пайыз босого чекти камсыздаган партиянын өкүлдөрү азыр парламентте отурат. ⠀ Кыргызстан Борбор Азиядагы эң жакыр өлкө. Менин ал жакта туугандарым, Бишкекте жерим да бар. Өлкө жакыр болгондуктан өзүмө тиешелүү жерди да сата албай жатам. Бизге ал жер мураска Совет бийлигинин тушунда берилген. Азыр ал жерде үйлөр бар, Бишкектин борборуна айланды. Мен өзүм ал жактанмын, Алмата жакын жерде, 150 чакырым. Душанбеден менин туугандарымды 90-жылдары кууп чыгышкан “, – деп билдирген Жирновский.

“Шамбала” тасмасы Россиядагы кинофестивалда көрсөтүлөт

12-октябрь 2020/informator.kg- Кыргызстандык режиссер Артыкпай Сүйүндүковдун “Шамбала” тасмасынын Россиядагы бет ачары XXIX “Киношок” ачык кинофестивалында болуп өтөт. Бул тууралуу Маданият, маалымат жана туризм министрлигинен билдиришти. Фестиваль Анапа шаарында 17-23-октябрь күндөрү болот. Аталган тасма толук метраждуу тасмалардын негизги сынагында көрсөтүлөт. “Шамбала” тасмасынын дүйнөлүк бет ачары ушул жылдын июль айында Шанхай кинофестивалында болуп өткөн. Тасма Чыңгыз Айтматовдун “Ак кеме” чыгармасынын негизинде тартылган.

Акыркы суткада 22 медицина кызматкери коронавирус илдетин жуктуруп алды

11-октябрь 2020/informator.kg-

Бир сутка ичинде өлкө боюнча 22 медицина кызматкери коронавирус жуктуруп алганы аныкталды. Бул тууралуу республикалык штабдан билдиришти.

Ош шаары – 6;
Баткен облусунда – 4;
Ош облусунда – 8;
Жалал-Абад облусунда – 4;

Ал эми бир суткада стационардан 1, үй карантининен 3 медкызматкер чыгарылган.
Жалпысынан республика боюнча COVID-19 диагнозу менен медициналык кызматкерлер арасында – 3415 катталса, алардын ичинен 3085 медкызматкер айыгып чыкты.

Тажикстанда президенттик шайлоо өтүп жатат

11-октябрь 2020/informator.kg- Бүгүн Тажикстанда президенттик шайлоо башталып, өлкөдө 3 414 добуш берүү участогу ачылды. Бул шайлоо көз карандысыз Тажикстандын тарыхындагы алтынчы президенттик шайлоо болуп саналат. Тажикстанда президенттике беш талапкер ат салышууда. Алар: Көз карандысыз профсоюздар федерациясы, Жаштар биримдиги жана Элдик-демократиялык партиясынын атынан учурдагы президент Эмомали Рахмон, Агрардык партиянын атынан Рустам Латифзода, Социалдык партиянын атынан Абдухалим Гаффорзода, Экономикалык реформалар партиясынын атынан Рустам Рахматзода жана Коммунисттик партиянын талапкери Миродж Абдуллоев. Шайлоонун жүрүшүнө ЕККУ, КМШ жана ШКУ уюмдарынан келген эл аралык байкоочулар көз салып турат. Бул жолку шайлоону Тажистандын Борбордук шайлоо комсиссиясы убактысынан бир ай мурда белгилеген. Анда дүйнөнүн 29 өлкөсүндө жүргөн тажикстандыктар дагы добуш бере алат.