Самое популярное

    Окуялар

    Окуялар

    Президентти уят кылышат…Иш башкармалыктын бала бакчасында да акча жыйналабы?


    Бишкек. Informator.kg  7.05.19.

    КРнын Президенти менен Өкмөтүнүн иш башкармалыгына тиешелүү №144-бала бакчада жеткинчектердин бүтүрүү кечесине эне-аталардан акча жыйналууда. Мындай кабар бизге өздүк булактар аркылуу жетти.

    Андагы маалыматтар боюнча,  иш башкармалыктагы аталган бала бакчанын жетекчилиги бүтүрүү кечесине арналган иш-чара үчүн ар бир балага 5 миң сомдон чогултууну эне аталарга буюрган. «Бүтүрүү кечеси үчүн эле 5 миңден чогултсак, андан тышкары ар бир балага айына 6-8 миңге чейин акы төлөйбүз. Оюнчукка, оюнга, театрга деген, эне-аталар фондуна деген да акчалар бар. Бул министрлерге эле ылайыкталбаса, айрым аппарат кызматкерлери үчүн абдан чоң сумма. Иш башкармалыктан деле бала бакчаны кармоого оңбогондой каражат бөлүнөт. Ал кайда кетет? Булар президентти да уят кылмай болушту»,-деп билдирет атын атагысы келбеген эне-аталардын бири.

    Бул боюнча Президенттин иш башкармалыгынын башчысы Турдуназир Бекбоевге чалганыбызда ал мындай маалыматтан кабары жоктугун айтты. «Эч кандай акча чогултуу жөнүндө сөз уккан эмесмин. Андайга жол берилбейт! Мен азыр баарын тактап, иликтеп силерге жооп кылам. Бала бакча жетиштүү каржыланат…»,-деди ал. 

    Эске сала кетсек, 144-бала бала бакчада  200гө чукул бала тарбияланат.

    Кыргыз Өкмөтү: “Өзбекстанга азырынча утула элекпиз”


    Бишкек. Informator.kg  7.05.19.

    КР Өкмөтүнүн арбитраждык трибуналда пансионат маселеси боюнча өзбек тарапка утулуусу тууралуу маалымат анык эмес экен. Бул боюнча Өкмөттүн маалыматтык камсыздоо бөлүмү билдирди.

     «Бир катар маалымат агенттиктеринде жана социалдык тармактарда тараган Кыргыз Республикасынын Өкмөтү Эл аралык арбитраждык сотто Ысык-Көл облусундагы пансионат маселеси боюнча өзбек тарапка утулду делген маалыматка тийиштүү төмөнкүлөрдү билдиребиз.

    Бүгүнкү күнү бул ишти Эл аралык арбитраждык сотто кароо уланууда.

    Белгилей кетүүчү нерсе, бул сыяктуу доо арыздарды кароодо көп учурда башында маселенин өзү эмес, ошол талашты кароого арбитраждык трибуналдын юрисдикциясынын бар болушу каралат. Ошондон кийин гана маселенин маңызы боюнча кароо процесси башталат.

    Үстүбүздөгү жылдын май айынын башында биринчи этабы аяктап, жыйынтыгы боюнча арбитраждык трибунал бул маселенин маңызын кароого юрисдикциясы бар экендиги тууралуу чечим чыгарган. Буга байланыштуу бул маселе боюнча Кыргыз Республикасынын Өкмөтү Эл аралык арбитраждык сотто утулгандыгы тууралуу маалымат анык эмес болуп саналат.

    Бүгүнкү күнү Өкмөт тарабынан чаралардын кеңири түрү көрүлүп жана далилдер базасын түзүү, доогердин аргументтерин изилдөө иштери жүргүзүлүп жатат»,-деп айтылат аталган маалымдамада.

    Эске сала кетсек, кыргызстандык юрист Жоомарт Жолдошев Эл аралык арбитраждык сотто Кыргызстан Өзбекстанга улутташтырган пансионаттар боюнча талашта юридикциялык жактан утулганын жазып чыккан эле.

    Мухаммедкалый Абулгазиев Любовь Костылеванын батасын алды


    Бишкек. Informator.kg  7.05.19.

    Премьер-министр Мухаммедкалый Абылгазиев Улуу Ата Мекендик согуштун ардагери Любовь Костылевадан кабар алды. Бул боюнча Өкмөттүк аппараттын маалыматтык камсыздоо бөлүмү билдирди.

    Бишкектин тургуну, 1941-1945-жылдардагы Улуу Ата Мекендик согуштун ардагери, жашы 100гө таяган  Любовь Костылеванын үйүнө баш баккан Өкмөт башчы 9-май – Жеңиш күнү менен куттуктап, ага бекем ден соолук каалады.

    «Силер биздин мамлекеттин өзөгүсүңөр. Сиздердин эрдик кайраттын жана ар-намыстын айкын үлгүсү катары кызмат өтөйт. Согуш жылдары сиздер көз көрбөгөн сыноолордон өтүп, кыйынчылыктарга карабастан жеңишке жетиштиңиздер. Эң оор мезгилде эрдик жасап, өлкөнү коргоп калдыңыздар. Андан соң согуштан кийинки жылдары Ата Мекендин бакубат жашоосу үчүн тынымсыз иштеп, республикабыздын бүгүнкү негизин түздүңүздөр», – деди Мухаммедкалый Абылгазиев.

    Андан ары ал Өкмөт дайыма согуштун ардагерлерине жана тылдын эмгекчилерине колдоо көрсөтөт деп ишендирди.

    «Эч ким көңүл буруусуз калбайт. Сиз сыяктуу адамдардын мисалында өсүп келе жаткан муунду тарбиялоо зарыл. Сиз аркылуу бардык согуш ардагерлерине жана тылдын эмгекчилерине чың ден соолук, руханий кайраттуулук жана узак өмүр каалайм. Мындан тышкары эртең улуу майрамды белгилей турган бардык мекендештерибизге – ачык асман жана бакубатчылык тилеп кетем!», – деди Мухаммедкалый Абылгазиев.

    Мындайга жетине албаган Любовь Костылева Премьер-министр менен согуш жана андан кийинки жылдар тууралуу эскерүүлөрү менен бөлүшүп, көңүл бургандыгы үчүн ыраазычылык айтып, батасын берди

    Министр Чыңгыз Айдарбеков Али Эрбаш менен жолугушту

    Бишкек. Informator.kg  7.05.19. КРнын Тышкы иштер министри Чыңгыз Айдарбеков Түркиянын дин иштери боюнча Башкармалыгынын төрагасы Али Эрбаш менен жолугушту. Бул тууралуу министрликтен маалымдашты.

    Анда белгилүү болгондой, жолугушууда диний чөйрөдөгү өз ара аракеттенүү маселелери каралып, тараптар билим берүү жана “Ыйман” диний маданиятты өнүктүрүү коомдук фондунун ишмердүүлүгүнүн алкагында жарандарды руханий-интеллектуалдык жактан агартуу чөйрөсүндө биргелешкен долбоорлорду жүзөгө ашыруу маселелерин талкуулады.

    Министр Ч.Айдарбеков Бишкек шаарындагы имам Сарахси атындагы борбордук мечиттин курулушуна жардам бергени үчүн түрк тарабына ыраазычылык билдирди. Бул мечит Түркиянын Президенти Р.Т.Эрдогандын 2018-жылдын 2-сентябрында КРга расмий сапарынын жүрүшүндө КР Президенти С.Ш.Жээнбековдун катышуусунда ачылган.

    Жолугушууда ошондой эле “Ыйман” диний маданиятты өнүктүрүү коомдук фондунун төрагасы Самаган Мырзаибраимов катышты.

    Президенттин кеңешчиси Дастан Догоев 6 саат суралды

    Бишкек. Informator.kg  7.05.19. Президент Сооронбай Жээнбековдун коомдук башталыштагы кеңешчиси, мурдагы Мамкаттоо кызматынын башчысы Дастан Догоев УКМК тарабынан алты саат суралды.

    Ал арада укук коргоочу Татту Мамбеталиева Дастан Догоев түшкү саат 11ден бери УКМКга чакырылып, сурак берип жатканын айтып, азырынча аны камоо тууралуу маалымат жоктугун айтууда.

    Эске сала кетсек, электрондук паспорт бланкаларын чыгаруу боюнча Мамлекеттик каттоо кызматынын өткөргөн тендери боюнча УКМК кылмыш ишин ачып, анын алкагында аталган кызматтагы үч жооптуу кызматкер камакка алынган. Ал арада бул ишке Президенттин электрондук маалымат саясаты боюнча кеңешчиси Дастан Догоев да аталган чырга байланышы бар экендиги айтылып жаткан.

    “Өлбөс полктун маршына” экс-президент Алмазбек Атамбаев катышуусу мүмкүн


    Бишкек. 9.05. 19. informator.kg Бүгүн Бишкекте Улуу Ата Мекендик согуштун жеңишине арналган “Өлбөс полктун жүрүшүнө” экс-президент Алмазбек Атамбаев катышышы мүмкүн. Бул тууралуу порталга өздүк булактардан белгилүү болду.

    Алардын маалыматына караганда, экс-президент Алмазбек Атамбаев балдары менен бирге согушка катышкан чоң аталарын эскерип, кыргыз эли менен бирге жүрүшкө катышууга ниет кылган.

    Эске сала кетсек, кечээ Президент Сооронбай Жээнбековдун маалымат кызматы Бишкек шаардык кеңеши аркылуу майрамдык жүрүштү дрон менен тартууга тыйуу салган чечим чыгарган болчу. Коомчулук бул чектөөнүн сырын түшүнө албай, соцтармактарда “Президенттин коопсуздугу коркунучтабы?” деген кабатырлануу күч алып жаткан эле.

    9-май. Улуу жеңиш. Арабызда 356 баатыр калды…


    Бишкек. 9.05. 19. informator.kg   Бүгүн Улуу Атамекендик согуштун жеңиш майрамы. Бул күндү мурдагы Советтик республикалардын көбү салтанаттуу майрамдашат. Анткени, арабызда ошол алааматка катышкан ардагерлердин аз болсо да көзү тирүү.

    КРнын эмгек жана социалдык өнүктүрүү министрлигинин расмий маалыматы боюнча, Кыргызстанда Улуу Атамекендик согуштун 356 ардагери жашап жатат. Президент Сооронбай Жээнбеков ар бир ардагерге бир жолку-20 миң сомдук материалдык жардам берүүнү буйрук кылды.

    9-май СССРдин улутчул-фашисттик Германияын баскынчылыгын токтоткон күн катары 1945-жылдан бери майрамдалып келет. 1941-жылдын 22-июнунда таңга маал СССРдин аймагына кол салган Адольф Гитлердин армиясын Иосиф Сталин башында турган совет эли 1945-жылы Германиянын борбору Берлинге чейин сүрүп барып, Рейхстагга 9-майдын таңында жеңиш туусун сайган эле. Төрт жылдан ашык бул кармашта жалпысынан 27 млн. адам көз жумуп, бул дүйнөдөгү адамзаттын жашоосуна эбегейсиз залал алып келген кандуу согуш катары айтылып келет.

    Кыргыз ССРнен жалпысынан 2-дүйнөлүк согушка 365 миң жоокер катышып,  анын 100 миңден ашууну кайтып келген эмес. 150 миң жоокер ар кандай эрдик орден, медальдар менен сыйланып, 72 кыргызстандык Советтер Союзунун Баатыры наамына татыган.

    Informator.kg маалымат порталы жалпы кыргызстандыктарды 9-май Жеңиш Күнү менен куттуктайт.  Биздин бүгүнкү эркиндиктин башаты кечээки Улуу Согушта жеңген чоң аталарыбыз, тылда тынымсыз эмгектенген чоң энелерибиз! Алардын эрдиги эч качан унутулбайт! 

    Жашасын, эркин Кыргызстан!

    Батукаевдин иши боюнча эки министр камакка алынат

    Informator.kg. 11.05.19. Мөөнөтүнөн мурда мыйзамсыз бошотулган кримлөк Азиз Батукаевдин иши боюнча мурдагы эки министр камакка алынат. Бул тууралуу укук коргоо органдарындагы өздүк булактар билдирди.

    Анда белгилүү болгондой, аталган иш боюнча тергөөгө чакырылган күбөлөр жана камакка алынган дарыгерлер жактан бул ишке жогору жактан мурдагы вице-премьер министр Шамиль Атаханов менен мурдагы Саламаттыкты сактоо министри Динара Сагинтаевалар тарабынан оозеки көрсөтмөлөр болгону болгон.

    Ал арада Азиз Батукаевди бошоткон маалда ЖАМКны жетектеп турган Зарылбек Рысалиев да ММКларга маек берип, жогорку экс-министрлерди ал ишке тиешеси бар деп атады.

    Ишке кире элек “КТ-Мобайлдын” жетекчилери 5 миң доллар айлык алат


    Бишкек. 13.05. 19. informator.kg Коомчулукта кызуу талкууланып жаткан “”КыргызТелеком” ААКсынын туундусу катары түзүлгөн “КТ-Мобайл” мамлекеттик компаниясынын жетек кызматындагылар 5 миң АКШ доллары өлчөмүндө айлык маяна алышат. Бул тууралуу infotmator.kg порталына өздүк булактардан маалым болду.

    Алар бизге жолдогон маалыматтарга карасак, компаниянын башкы директору Нурбек Мукамбетовдун бир айлык маянасы 350 миң сом же 5 миң АКШ долларын түзөт. Ошондой эле анын орун басары Эрназар Рысалиевдин айлык маянасы 300 миң сом. Андан ары Техникалык директор Николай Дмитриенко-290 миң сом, Долбоордун башчысы Руслан Гайдаров 140 миң, роуминг боюнча жетекчи Раушан Белекова 85 миң сом айлык алып, тизме узарып кете берет.

    порталдын колуна тийген справка

    Кызыгы, жакында “КТ-Мобайл” компаниясы мамлекеттик 2-уюлдук оператор болуп түзүлүп, байланыш рыногуна кирүүнү пландап жаткан. Бирок, 2018-жылы түзүлгөн бул компания өзү “Кыргызтелекомго” ири суммадагы карызы бар экени айтылып келет. Азырынча, компания мамлекетке бир тыйын салык төлөп, киреше да алып келе элек. Буга карабай, андагы кызмат жетекчилеринин бюджеттен, демек, элден чогулган салыктан чоң каражаттарды айлык катары алып жатканы түшүнүксүз.

    Баса, economist.kg порталынын былйыл жыл башындагы маалыматы боюнча, “Кыргызтелеком” ишканасы Кыргызстандагы №1-карызы көп ишкана катары саналат жана анын жалпы карызы 107 млн. сомду түзөт. Башкача айтканда, мамлекетке жана жеке жактарга карызы көп, банкроттук ишкана.

    Мурдагы министр Иманкадыр Рысалиев

    Кошумчалай кетсек, буга чейин айрым маалымат булактары “КТ-Мобайлдын” башкы директорунун орун басары Эрназар Рысалиев мурдагы министр Иманкадыр Рысалиевдин уулу экендигин, ал болсо азыркы Өкмөт башчысы Мухаммедкалый Абулгазиевдин бажасы, экс-төрага Асилбек Жээнбековдун төрага маалындагы кеңешчиси экендигин жазып, муну ал өзү да ырастаган болчу.

    Эрназар Рысалиевдин сүрөтү ачык булактардан

    Ыдырыс Исаков, “Азаттыктын” Оштогу кабарчысы: “Мага ыдык көрсөткөндөрдүн үстүнөн арыз жаздым”

    Бишкек. 13.05.19. informator.kg Бүгүн түшкө маал “Азаттык” үналгысынын Оштогу кабарчысы Ыдырыс Исаков “Делюкс” мейманканасынын капталындагы аты жок кумаркананын күзөтчүлөрү тарабынан кол салууга туш болгон. Андан ал аталган кумарканага көп акча уттурган жарандардан маек алып жаткан болчу.

    Биз журналист менен байланышканыбызда ал Ош шаардык Ички иштер башкармалыгында өзүнө кол салгандардын үстүнөн арыз жазып жатканын айтты. “Учурда мага кол салган эки кумаркана кызматкери камакка алынды. Мен алардан запкы жегеним боюнча арызымды жазып жатам. Милиция ишти каттоого алып, тергөө иштерин баштаарын билдирди. Азырынча саламаттыгым жакшы”,-деп айтты Ыдырыс Исаков.

    Эске сала кетсек, Кыргызстанда кумар оюндарына атайын мыйзам аркылуу туйуу салынган. Бирок, буга карабай, жашыруун иштеп жаткан кумарканалар боюнча маалыматтар ири шаарларда айтылып келет.

    123...204Страница 1 из 204

    Категориялар

    © Баардыгы билсин — Информатор.kg