Саясат

Саясат

Садыр Жапаровдун акыркы жолугушуусу Бишкек шаарында, эски аянтта миңдеген элдин катышуусунда өттү

Бишкек. 8.01.21. informator.kg Президенттик шайлоого эки күн калды. Дээрлик бир айга созулган үгүт иштери аяктап, талапкерлер эл менен акыркы жолугушууларын өткөрүүдө. 10-январда Кыргызстанда парламенттик шайлоо. Аны менен бирге өлкөнү башкаруунун формасын тандоо алдында турабыз. Тактап айтканда, президенттик же парламенттик башкаруу!


Кандай башкарууну тандайбыз? Мындан ары кайсы башкаруу менен жашайбыз, аны эл өзүбүз чечебиз. Башка талапкерлер сыяктуу эле Садыр Жапаров да Кыргызстанды түрө кыдырып, эл менен жолукту. Талапкер 8-январда Бишкек шаарынын жашоочулары менен жолугушту. Жолугушуу эски аянтта, бир нече миңдеген шаар тургундарынын катышуусунда өттү. Эски аянтка чогулган эл – Садыр Жапаровду шатырата кол чаап шаңдуу тосуп алышты.
Эл менен жакындан жолуккан Садыр Жапаров – адегенде сөзүн Бишкек шаарын өнүктүрүү боюнча программасын айтуу менен баштады. Андан соң эл тарабынан берилген суроолорго токтолду. Албетте, билинбегени менен Бишкек шаарында чечилбеген көйгөй көп. Элдин берген суроолору да ошол айлап, жылдап чечилбей келе жаткан көп жылдык көйгөйлөр. Эл берген суроолордун ар бирин өзүнчө тиркеп, президент болуп калса, көз жаздымда калтырбай чечүүгө аракет жасаарын баса белгиледи. Садыр Жапаров Бишкектеги көйгөйлөрдү да кароосуз калтырбасын билдирди.
“Борбор калаабыз Бишкек шаары өлкөбүздүн жүрөгү. Баарыбыз Бишкек шаарына байырлайбыз. Бишкек шаары жакынкы жылдары гүлдөгөн жашыл шаарга айланууга тийиш. Кудай буюруп, сиздер колдоп президент болуп калсам, Бишкек шаарын гүлдөгөн шаарга айлантууга бар күчүмдү жумшайм. Жакынкы жылдары күбө болосуздар. Өзгөрүүнү жакынкы убактарда сезесиздер!” – деди Садыр Жапаров.
Ошондой эле ички мигарция, элдин шаарга токтоосуз агылуусу боюнча да суроо берилип, ал суроого: “Биздин аймактарды өнүктүрүү боюнча программабыз бар. Ал программа мен президент болгон күндөн баштап иштеп баштайт. Ага ылайык, Кыргызстандын 7 облусуна көп кабаттуу үйлөрдү курууга, чакан фабрикаларды ачууга аракеттерди жасайбыз. Инвестрлор менен тыгыз иштешебиз. Биринчи облустарга иш орундарын түзүп, аймактардын инфраструктуралык абалын жакшыртып алсак, ички миграция токтойт!” – деди Садыр Жапаров.
Мектеп, бала бакчалардын жетишсиздиги боюнча берилген суроого талапкер ал маселе чечиле турганын, инвесторлор менен буга чейин сүйлөшүүлөр болгондугун айтты.
Эл алдына чыгып, сөз алып сүйлөгөн “Гармония” атындагы орус коомдук маданий борборунун жетекчиси Александр Степанюк, Кыргызстан көп улуттуу өлкө экенин, кайсыл улуттун эли болбосун бардыгы тең Кыргызстандын өнүгүшүн, элдин тынчтыгын тилешээрин, мамлекетти сүйүп, элди урматташаарын айтып, Садыр Жапаровго жеңиш жана ийгилик каалады.
Талапкерге ийгилик каалаган Аялдар комитетинин төрайымынын орун басары Дарика Мамбетова – Садыр Жапаров элдин адамы экенин, аны эл жапырт колдоорун айтты.
“Садыр Жапаров кыска убакыттын ичинде өлкөдө стабилдүүлүктү орното алды. Аз күндө ал мурунку лидерлер жылдап чече албай келген көптөгөн адамдардын көйгөйлөрүн чечти. Кыргызстандын тарыхында биринчи жолу мамлекеттик башкаруунун формасы элдин тандоосуна коюлду!” – деди ал.
Кычыраган суукка байланыштуу жолугушуу узакка созулган жок. Садыр Жапаров калган суроолорду 8-январ күнү кечки саат 20:00 дө 7-каналда түз эфирде болоорун, суроо бере албай калгандар, суроолорун түз байланыш аркылуу жолдосо – жооп берээрин айтты. Жолугушуунун соңунда, буга чейин болуп келгендей аксакал эл алдына чыгып, Садыр Жапаровго ак жол каалап, ак батасын берди. Күндүн ызгаар суугуна карабай аянтка чогулган эл, 10-январдагы президенттик шайлоодо добуштарын Садыр Жапаровго беребиз деп билдиришти.

Аткаруучу: « informator.kg » ; дареги: Кыргыз Республикасы, Бишкек ш.,. Кулатов 8
Буюртмачы: Төлөгөнова Аида Бейшеналиевна, Кыргыз Республикасынын Президентинин кызматына талапкер Жапаров Садыр Нургожоевичтин каржы маселелери боюнча ыйгарым укуктуу өкүлү.
Нускасы: 1. 2021-жылдын 08-январда даярдалды.
Кыргыз Республикасынын Президентинин кызматына талапкер Жапаров Садыр Нургожоевичтин шайлоо фондунан каржы маселелери боюнча ыйгарым укуктуу өкүлү Төлөгөнова Аида Бейшеналиевна тарабынан төлөндү (күб. № 35, 16.11.2020-ж).

Садыр ЖАПАРОВ: “Орус тилинин макамын сактап калуу менен кыргыз тилин үйрөнүүнү күчөтүү керек”

Бишкек. 07.01.21. informator.kg Садыр Жапаровду өлкө аймагынын тургундары кызуу колдоого алышууда. Ал эми борбор калаада жашагандар ага азырынча этият мамиле кылышууда. Анткени Садыр Нургожоевич кыргыз тилинде сүйлөгөндү артык көрөт. Ал өзүнүн маектеринин биринде кыргызча ойлонорун жана кыргызча сүйлөп көнгөндүгүн, бирок зарыл болгон учурда орус тилинде да сүйлөй аларын айткан эле.

Бирок ошентсе да бишкектиктердин маанайына таасир эте турган айрым бир суроолордун башы ачык калганын айта кетели.   

– Садыр Нургожоевич, графигиңиздин тыгыз экенине карабай убакыт бөлгөнүңүзгө ыракмат…

– Сиз суроолоруңузду бере электе Кыргызстандагы бардык православдарды дагы бир жолу эң башкы диний майрамдарынын бири – Иса Пайгамбардын Туулган күнү менен куттуктап койгум келет!  

Кыргызстандагы коом ачык жана максатыбыз бир. Ошондуктан эзелтен калыптанып калган салтка ылайык, бири-бирибиздин майрамдарыбызды дайыма жакшы маанайда, чын дилибизден кубанып белгилеп келебиз.   

Мына ушул бүгүнкү майрамда да көптөгөн православ дининдеги мекендештерибиз өзүлөрүнүн мусулман досторунан “Иса Пайгамбардын Туулган күнү кут болсун!” – деген куттуктоону угушаарын билем. Бизди күчтүү, бекем коом кылган дал мына ушундай руханий биримдик. Мындан ары да ушундай болушу керек!

– Ошентсе да орус тилдүү шайлоочулар Сизди орус тилинде көп сүйлөбөйт деп кабатыр болушууда?

– Мен бул туурасында айткам, дагы бир жолу кайталап коёюн. Мен орус тилин жакшы эле билем, сүйлөй да алам, бирок мен кыргызмын да!? Кыргызча ойлоном, кыргызча сүйлөйм. Негизи менин кайсы тилде сүйлөөрүмдүн мааниси жок, башкысы, аткарып жаткан ишим эмеспи? Мекенчил адам үчүн иштин көзүн таба билүү маанилүү.

Орус тилине келсек, мен анын ролун жана маанисин абдан жакшы билем. Ошондуктан орус тили, мен буга чейин баса белгилеп айткандай, Кыргызстанда расмий макамын сактап кала берүүгө тийиш. Мен орус тилинин макамын басмырлоого жол бербейм. Аймактарда орус тилин окуп үйрөнүүгө болгон муктаждык абдан жогору экенин, бирок мугалимдер жетишпей жатканынан жакшы кабардармын. Бул маселени чечишибиз керек. Ошол эле мезгилде Кыргызстанда жашаган орус тилдүү жарандарыбыз да, кыргыз тилин үйрөнүүсү зарыл деп эсептейм. Бирок бул маселеде кыргыз тилин окутуунун усулу бизде абдан чабал экенин моюнга алганыбыз оң. Ошондуктан бул маселе менен тыгыз иштеп, кыргыз тилин да, орус тилин да окутуу сапатын жаңы деңгээлге көтөрүшүбүз керек.         

– Садыр Нургожоевич, шайлоочулар менен болгон жолугушууларыңызда Сизден Россия менен кош жарандуулук жөнүндө көп жолу сурашты. Бул туурасында оюңуз кандай?

– Бул маселе алиге чейин чечилбей келатканына өкүнөм. Россияда учурда 1,5 миллиондой кыргызстандыктар иштеп жүрүшөт. Аларда кош жарандуулук болсо, туура болмок деп эсептейм. Анткени Кыргызстандын жараны болуп, ошол эле кезде Россия аймагындагы жеңилдиктерден да пайдалана беришмек. Анын үстүнө, алардын ал жакта оокат мүлкү бар, балдары мектепке, бала бакчага барууда. Андыктан мен бул идеяны кош колдоп колдойм жана шайлоодо утуп чыксам, бул маселеге олуттуу киришем..

– Россия жөнүндө кепти уланталы. Аскер базасы жөнүндө коомчулукта көп айтылат. Балким, андан баш тартып койсок кантет?  

– Эч качан! Мунун себебин чечмелей кетейин. Аскер базасы менен аскер кубаты Россияга караганда бизге көбүрөөк керек. Кыргызстан ЖККУнун мүчөсү экенин да унутпаңыз. Биздин чек аралар ЖККУ менен Евразиялык биримдиктин да тышкы чектери болуп саналат. Бул биз үчүн гана эмес, кошуна өлкөлөр үчүн да стратегиялык маселе. Албетте, биз чек араларыбызды экстремисттик жана террордук күчтөрдүн мүмкүн болгон кысымынан эч кимдин жардамы жок эле өз күчүбүз менен коргоону камсыздай алсак жакшы болмок.

Жалпысынан Россия туурасында айта турган болсок, биз бул өлкө менен болгон кызматташтыктын потенциалын толук колдоно албай жатабыз деп эсептейм. ЕАЭБ жана ЖККУнун багыттары боюнча көптөгөн пайдалуу долбоорлор баягы эле бюрократиялык тосмолордон, чиновниктерибиздин иштин көзүн таба албаганынан жана жалкоолугунан токтоп калган. 

Биз аскерий же экономикалык кызматташтык гана эмес, башка көп багыттар боюнча, маселен, жаңы өндүрүштөрдү ишке киргизүү, маданий демилгелер, билим берүү жана илимий долбоорлор туурасында сүйлөшсөк болот. Алтургай, биз евразиялык мейкиндиктин катышуучусу катары Россия менен гана эмес, евразиялык башка өлкөлөр менен да ушул багыттар боюнча иштөөгө тийишпиз. Мындан улам биздин алдыбызда чети оюла элек жумуш талаасы турат, эмне деген мүмкүнчүлүктөргө, келечектүү иштерге жол ачылууда. Эң башкысы – кара баштын эмес, элдин, урпактардын кызыкчылыгын ойлоп иш кылуубуз зарыл. Ошондо баары ишке ашат!

Аткаруучу: «Informator.kg» ; дареги: Кыргыз Республикасы, Бишкек ш., Кулатов көч.8.

Буюртмачы: Төлөгөнова Аида Бейшеналиевна, Кыргыз Республикасынын Президентинин кызматына талапкер Жапаров Садыр Нургожоевичтин каржы маселелери боюнча ыйгарым укуктуу өкүлү.

Нускасы:1. . 2021-жылдын 07-январда даярдалды.

Кыргыз Республикасынын Президентинин кызматына талапкер Жапаров Садыр Нургожоевичтин шайлоо фондунан каржы маселелери боюнча ыйгарым укуктуу өкүлү Төлөгөнова Аида Бейшеналиевна тарабынан төлөндү (күб. № 35, 16.11.2020-ж).

АКШда «кыргызация» ишке ашабы? Вашингтондо полиция Трамптын тарапкерлерин тынчытты

Бишкек. 7.07. 21. Informator.kg  АКШнын борбору Вашингтондо полиция Конгресстин имаратын басып алган президент Дональд Трамптын жактоочуларын кууп таратты. Күч түзүмдөрү имаратты толук бошотуп, тартип бузгандардын камакка алып жатканын, 7-январдын таңында коменданттык саат иштеп жатканын эл аралык ММКлар кабарлашууда.

Эске сала кетсек, кечээ Конгресстин кош палатасы Кошмо Штаттардын шайланган президенти Жо Байдендин шайлоодо жеңишин расмий бекитиш үчүн жыйын өткөрүп жаткан учурда Акүй алдында митинг кылып жаткан Дональд Трамптын тарапташтарынын алардын бир тобу Капитолийдин имаратын каптап келип, тосмолордон ашып,. Имараттын ичине кирип кеткен болчу.

Бүгүн Жогорку сотто Аида Салянованын иши кайра каралат

Бишкек. 6.01.21  informator.kg  Бүгүн, 6-январда Жогорку Сотто мурдагы юстиция министри, экс-башкы прокурор жана мурдагы депутат Аида Салянованын Алексей Елисеевдин адвокаттык лицензиясынын узартылышына байланыштуу иши кайрадан карайт.

Бул тууралуу Салянованын адвокаты Рабига Сыдыкованын айтымында, ишти кайра кароого үч жагдай негиз болгон. Андыктан, Аида Салянованын адвокаттары жаңы жагдайлар боюнча ишти кайрадан кароону өтүнүп, Жогорку сотко кайрылган.

Эске сала кетсек, Аида Салянова 2010-жылы юстиция министринин милдетин аткарып турганда мурдагы президенттин уулу Максим Бакиевдин өнөктөшү Алексей Елисеевдин адвокаттык лицензиясын мыйзамсыз узарткан жана бул ишти жетиштүү иликтеген эмес деген жүйө менен айыптаган.

2017-жылы Бишкектин Ленин райондук соту аны беш жылга эркинен ажыратып, үй-мүлкүн конфискациялоо тууралуу чечим чыгарган. Жазаны экс-прокурор кызы 14 жашка толгондон кийин өтөй турган болгон. Соттун бул чечимин кийинки инстанциялар да күчүндө калтырган.

2019-жылдын декабрь айында Жогорку сот жаңы кодекстер күчүнө киргенине байланыштуу ишти кайра карап, Салянованын жазасын өзгөрткөн эмес.

Вице-премьер министр Э. Сурабалдиева Чүй облусун кыдырды

Бишкек. 6.01.21  informator.kg  Кечээ, 5-январда Вице-премьер-министр Эльвира Сурабалдиева Чүй районуна иш сапары менен барып, социалдык көйгөйлөр менен таанышып кайтты. Бул тууралуу өкмөттүн маалымат кызматынан кабарлашат.

Анда министр Чүй райондук жаш өспүрүмдөрдүн чыгармачылык Борборунда болуп, 19 ар түрдүү ийримдер боюнча 700дөн ашуун балдарды тарбиялап жаткан жайдын көйгөйлөрү менен таанышты.

Ошону менен катар эле ал Токмоктогу ээнсиреп турган агроөнөржай колледжине барып, окуу жайдын жатаканасынын бир имаратын интернатта окугандар үчүн жатакана кылууга жана бир имаратты балдардын окуу борбору катары иштетүү боюнча иш-мерчемдерди колдоого алаарын билдирген.

«Биз үчүн эң башкысы мындай имараттар ээн турбай, келечек үчүн жакшы багытта иштеши керек. Бул балким медицина же билим берүү тармагынла иштеген кызматкерлер үчүн үй, социалдык кызматкерлерге же болбосо балдар үйү, болбосо институт же окуу борбору катары. Бул суроолордун үстүндө иштешибиз зарыл”,-деген Э. Сурабалдиева.

“Андан ары вице-премьер “Затейник” аталышындагы болбар борборуна барып, турмуштук татаал шарттардан улам бул жерде тарбияланып жаткан бөбөктөрдөн кабар алып, андан соң Кант шаарында социалдык тармактагы тийиштүү жетекчилерге бир катар тапшырмаларды берди. Ошондой эле Ысык-Ата районундагы балдардын спорттук оюндар жана кышкы спорттун түрлөрү боюнча спорттук мектепте болуп кайтты”,-деп айтылат маалыматта.

“Сары Бокеге” издөө жарыяланды

Бишкек. 05.01.2021. informator.kg УКМКнын мурдагы орун басар төрагасы, эл ичинде “Сары Боке” каймана аты бар Болот Сүйүмбаевге УКМК тарабынан издөө жарыяланды. Бул тууралуу башкы коопсуздук органынан кабарлашат.

Андагы маалыматтар боюнча, Б. Сүйүмбаевге экономикалык аткезчилик жана кызмат абалынан кыянат пайдалануу беренеси менен кылмыш иши ачылган.

“Жогоруда айтылган сотко чейинки өндүрүштүн алкагында мурунку орун басар Б.Суюмбаевдин бул кылмышка тиешеси бар же жок экендиги боюнча бир нече жолу суракка жана башка тергөө иш-аракеттерине чакырылган туралуу танылгыс далилдер алынды.

Б.Суюмбаевдин сурака келбей жаткандыгына байланыштуу, КР УКМК тергөө органдары тарабынан Кылмыш-жаза кодексинин 320-беренесинин 3-бөлүмү (кызмат абалынан кыянаттык менен пайдалануу) жана 223-берененсининт 2-бөлүмү (экономикалык кантарбанда) боюнча кылмышка шектүү деген билдирүү берилип, ага издөө жарыяланган.

Б.Т.Суюмбаевдин жүргөн жерин көргөн же билген адамдар УКМК нөөмөт кызматына 0312 66-04-75 же 102 (КР ИИМ нөөмөт бөлүмү) телефон аркылуу кабар берсеңиздер болот. Анонимдүүлүккө кепилдик берилет”,-деп айтылат маалыматта.

Жэк Ма 2 айдан бери дайынсыз жок

Бишкек. 05.01.2021. informator.kg Азиядагы эң бай адамдардын бири, “Alibaba” интернет дүкөндөр түйүнүн ээси Жэк Ма эки айдан бери дайынсыз болууда. Бул тууралуу “Азаттык” жазып, ал акыркы жолу ал Шанхайдагы ири экономикалык жыйынга катышып, анда Кытайдын базар мамилелерин жөндөөчү мекемесин курч сындап сөз сүйлөгөндөн кийин бийлик тарабынан кысым болгонун билдирет.

“Жэк Ма мырзанын 2020-жылдын октябрындагы сынынан соң Кытайдагы ишкердикке көзөмөлдөөчүлөр “Alibaba” компаниясына жана анын кол астындагы “Ant Group” каржылык компаниясына каршы антимонополиялык жактан тергөө ишин баштаган”,-деп билдирет маалымат булагы.

Эске сала кетсек, 2018-жылдын ноябрында “Форбс” журналы Жэк Ма 35,8 млрд доллар байлыктын ээси экенин, ал дүйнөдөгү эң бай 18-киши экенин жазган.

Президентикке талапкерлер 105 млн. сом коротушту

Бишкек. 05.01.2021. informator.kg Кыргызстандын Президенттигине талапкер болгон 17 адам шайлоого үгүттөө иштери башталгандан бери жалпысынан 105 млн. сом коротушту. Бул тууралуу БШКдан кабарлашат.

Андагы маалыматтар боюнча, капчыгы калың талапкерлердин сап башында Садыр жапаров туруп, 62 млн. 49 миң 700 сом жыйнап, анын 57 млн. 531 миң 126 сомун сарптап үлгүргөн.

Каната Исаев — 1 миллион 412 миң сом жыйнап, 1 миллион 348 миң 620 сомун коротсо, Мыктыбек Арстанбек 1 миллион 117 миң сом чогултуп, анын 1 миллион 115 миң 750 сарптаса, Клары Сооронкулованын эсебине — 1 миллион 128 миң 650 сом түшүп, 1 миллион 50 миң 80 сомун үгүткө жумшаган.

Имамидин Ташов 4 миллион 924 миң 600 сомду эсебине жыйнап, кайра 4 миллион 924 миң 600 сомду чыгаша кылса,  Абдил Сегизбаев — 4 миллион 609 миң 910 сом таап, — 4 миллион 546 миң 510 сомун коротуп үлгүрдү.

Адахан Мадумаров болсо 2 миллион 847 миң 100 сом эсебине салып, андан 2 миллион 845 миң 676 сомду үгүт иштерине сарптады. Аймена Касенова 3 миллион 872 миң 805 сом жыйнап, кайра эле анын 3 миллион 758 миң 398 сомун жок кылды.

Улукбека Кочкоров болсо болгону 1 миллион 724 миң 890 сом эсебине салып, анын 1 миллион 634 миң 383 сомун шайлоого сарптады.

Жеңишбек Байгуттиев 2 миллион, 963 миң 867 сом, Эльдара Абакиров 1 миллион 563 миң 636 сом, Курсан Асанов 2 миллион 494 миң 264 сом, Арстанбек Абдылдаев 2 миллион 305 миң 415, Равшан Жеенбеков 3 миллион 143 миң 673 сом коротту.

Бактыбек Калмаматов болсо 1 миллион 410 миң 151 сомду үгүттөөгө жумшаса, Бабыржан Төльбаев 14 миллионо 224 миң 572 сом таап, анын 10 миллион 872 миң 523 сомун шайлоого чыгымдаса, Каныбек Иманалиев — 1 миллион 962 миң 568 сом таап, 1 миллион 962 миң 320 сомун коротуп бүттү.

Жалпысынан алганда баардык талапкерлер 114 млн. 258 миң 464 сом жыйнап, 105 миллион 470 миң 992 сомун коротуп коюшту.

КТР YouTubeдагы талапкерлердин дебатын калыбына келтирди

Бишкек. 04.01.2021. informator.kg  Бүгүн Коомдук Биринчи каналдын YouTube-баракчасына 2020-жылдын 30-декабрында болуп өткөн КРнын Президенттигине талапкерлердин дебаты кайрадан жайгаштырылды.

Анда талапкерлер Абдиль Сегизбаев, Бабыржан Төльбаев, Женишбек Байгуттиев, Курсан Асанов, Равшан Жеенбеков жана Улукбек Кочкоровдор шайлоо алдындагы программаларын тааныштырып, суроо-жооптор менен эфир курч талкууда өткөн болчу.

Бирок, эртеси бул дебат каналдын YouTube-баракчасынан “жоголуп” кетип, коомчулук чуу көтөргөндө, каналдын жетекчилиги тасма техникалык катачылыктардан улам алынып, салынганын, кайра жайгаштырылаарын түшүндүргөн эле.

Ал тургай бул боюнча БШКда да жыйын өтүп, каналга эскертүү берилген.

Финполдун башчысы Сыймык Жапыкеев ооруканага жаткырылды

Бишкек. 04.01.2021. informator.kg Кыргызстандагы экономикалык кылмыштарга каршы күрөшүү кызматынын(финпол) башчысы Сыймык Жапыкеев ооруканага жаткырылды. Бул тууралуу ал өзү соцтармактардагы баракчасына кабарлады.

“Достор баары жакшы, сахар кучоп, бугун которулуп кетти, ден соолука акыркы кундору катуу куч келип кетти  (нерв). Сахарды бир да окумуштуу айыктара албай койду. Эч жерин оорубайт, бирок бут органдарды жейт экен. Буюрса бир жума ден соолукту карап, анан ишке киришелик. Догдурга баш ийбесе болбойт, жаткырышты”,-деп жазды ал.

Эске сала кетсек, “Чоң казат” партиясынын лидери С. Жапыкеев 2020-жылдын 5-октябрындагы бийлик төңкөрүшүнөн кийин бул кызматка дайындалган.