Саясат

Саясат Страница 2

Вице-премьер министр Э. Сурабалдиева Чүй облусун кыдырды

Бишкек. 6.01.21  informator.kg  Кечээ, 5-январда Вице-премьер-министр Эльвира Сурабалдиева Чүй районуна иш сапары менен барып, социалдык көйгөйлөр менен таанышып кайтты. Бул тууралуу өкмөттүн маалымат кызматынан кабарлашат.

Анда министр Чүй райондук жаш өспүрүмдөрдүн чыгармачылык Борборунда болуп, 19 ар түрдүү ийримдер боюнча 700дөн ашуун балдарды тарбиялап жаткан жайдын көйгөйлөрү менен таанышты.

Ошону менен катар эле ал Токмоктогу ээнсиреп турган агроөнөржай колледжине барып, окуу жайдын жатаканасынын бир имаратын интернатта окугандар үчүн жатакана кылууга жана бир имаратты балдардын окуу борбору катары иштетүү боюнча иш-мерчемдерди колдоого алаарын билдирген.

«Биз үчүн эң башкысы мындай имараттар ээн турбай, келечек үчүн жакшы багытта иштеши керек. Бул балким медицина же билим берүү тармагынла иштеген кызматкерлер үчүн үй, социалдык кызматкерлерге же болбосо балдар үйү, болбосо институт же окуу борбору катары. Бул суроолордун үстүндө иштешибиз зарыл”,-деген Э. Сурабалдиева.

“Андан ары вице-премьер “Затейник” аталышындагы болбар борборуна барып, турмуштук татаал шарттардан улам бул жерде тарбияланып жаткан бөбөктөрдөн кабар алып, андан соң Кант шаарында социалдык тармактагы тийиштүү жетекчилерге бир катар тапшырмаларды берди. Ошондой эле Ысык-Ата районундагы балдардын спорттук оюндар жана кышкы спорттун түрлөрү боюнча спорттук мектепте болуп кайтты”,-деп айтылат маалыматта.

“Сары Бокеге” издөө жарыяланды

Бишкек. 05.01.2021. informator.kg УКМКнын мурдагы орун басар төрагасы, эл ичинде “Сары Боке” каймана аты бар Болот Сүйүмбаевге УКМК тарабынан издөө жарыяланды. Бул тууралуу башкы коопсуздук органынан кабарлашат.

Андагы маалыматтар боюнча, Б. Сүйүмбаевге экономикалык аткезчилик жана кызмат абалынан кыянат пайдалануу беренеси менен кылмыш иши ачылган.

“Жогоруда айтылган сотко чейинки өндүрүштүн алкагында мурунку орун басар Б.Суюмбаевдин бул кылмышка тиешеси бар же жок экендиги боюнча бир нече жолу суракка жана башка тергөө иш-аракеттерине чакырылган туралуу танылгыс далилдер алынды.

Б.Суюмбаевдин сурака келбей жаткандыгына байланыштуу, КР УКМК тергөө органдары тарабынан Кылмыш-жаза кодексинин 320-беренесинин 3-бөлүмү (кызмат абалынан кыянаттык менен пайдалануу) жана 223-берененсининт 2-бөлүмү (экономикалык кантарбанда) боюнча кылмышка шектүү деген билдирүү берилип, ага издөө жарыяланган.

Б.Т.Суюмбаевдин жүргөн жерин көргөн же билген адамдар УКМК нөөмөт кызматына 0312 66-04-75 же 102 (КР ИИМ нөөмөт бөлүмү) телефон аркылуу кабар берсеңиздер болот. Анонимдүүлүккө кепилдик берилет”,-деп айтылат маалыматта.

Жэк Ма 2 айдан бери дайынсыз жок

Бишкек. 05.01.2021. informator.kg Азиядагы эң бай адамдардын бири, “Alibaba” интернет дүкөндөр түйүнүн ээси Жэк Ма эки айдан бери дайынсыз болууда. Бул тууралуу “Азаттык” жазып, ал акыркы жолу ал Шанхайдагы ири экономикалык жыйынга катышып, анда Кытайдын базар мамилелерин жөндөөчү мекемесин курч сындап сөз сүйлөгөндөн кийин бийлик тарабынан кысым болгонун билдирет.

“Жэк Ма мырзанын 2020-жылдын октябрындагы сынынан соң Кытайдагы ишкердикке көзөмөлдөөчүлөр “Alibaba” компаниясына жана анын кол астындагы “Ant Group” каржылык компаниясына каршы антимонополиялык жактан тергөө ишин баштаган”,-деп билдирет маалымат булагы.

Эске сала кетсек, 2018-жылдын ноябрында “Форбс” журналы Жэк Ма 35,8 млрд доллар байлыктын ээси экенин, ал дүйнөдөгү эң бай 18-киши экенин жазган.

Президентикке талапкерлер 105 млн. сом коротушту

Бишкек. 05.01.2021. informator.kg Кыргызстандын Президенттигине талапкер болгон 17 адам шайлоого үгүттөө иштери башталгандан бери жалпысынан 105 млн. сом коротушту. Бул тууралуу БШКдан кабарлашат.

Андагы маалыматтар боюнча, капчыгы калың талапкерлердин сап башында Садыр жапаров туруп, 62 млн. 49 миң 700 сом жыйнап, анын 57 млн. 531 миң 126 сомун сарптап үлгүргөн.

Каната Исаев — 1 миллион 412 миң сом жыйнап, 1 миллион 348 миң 620 сомун коротсо, Мыктыбек Арстанбек 1 миллион 117 миң сом чогултуп, анын 1 миллион 115 миң 750 сарптаса, Клары Сооронкулованын эсебине — 1 миллион 128 миң 650 сом түшүп, 1 миллион 50 миң 80 сомун үгүткө жумшаган.

Имамидин Ташов 4 миллион 924 миң 600 сомду эсебине жыйнап, кайра 4 миллион 924 миң 600 сомду чыгаша кылса,  Абдил Сегизбаев — 4 миллион 609 миң 910 сом таап, — 4 миллион 546 миң 510 сомун коротуп үлгүрдү.

Адахан Мадумаров болсо 2 миллион 847 миң 100 сом эсебине салып, андан 2 миллион 845 миң 676 сомду үгүт иштерине сарптады. Аймена Касенова 3 миллион 872 миң 805 сом жыйнап, кайра эле анын 3 миллион 758 миң 398 сомун жок кылды.

Улукбека Кочкоров болсо болгону 1 миллион 724 миң 890 сом эсебине салып, анын 1 миллион 634 миң 383 сомун шайлоого сарптады.

Жеңишбек Байгуттиев 2 миллион, 963 миң 867 сом, Эльдара Абакиров 1 миллион 563 миң 636 сом, Курсан Асанов 2 миллион 494 миң 264 сом, Арстанбек Абдылдаев 2 миллион 305 миң 415, Равшан Жеенбеков 3 миллион 143 миң 673 сом коротту.

Бактыбек Калмаматов болсо 1 миллион 410 миң 151 сомду үгүттөөгө жумшаса, Бабыржан Төльбаев 14 миллионо 224 миң 572 сом таап, анын 10 миллион 872 миң 523 сомун шайлоого чыгымдаса, Каныбек Иманалиев — 1 миллион 962 миң 568 сом таап, 1 миллион 962 миң 320 сомун коротуп бүттү.

Жалпысынан алганда баардык талапкерлер 114 млн. 258 миң 464 сом жыйнап, 105 миллион 470 миң 992 сомун коротуп коюшту.

КТР YouTubeдагы талапкерлердин дебатын калыбына келтирди

Бишкек. 04.01.2021. informator.kg  Бүгүн Коомдук Биринчи каналдын YouTube-баракчасына 2020-жылдын 30-декабрында болуп өткөн КРнын Президенттигине талапкерлердин дебаты кайрадан жайгаштырылды.

Анда талапкерлер Абдиль Сегизбаев, Бабыржан Төльбаев, Женишбек Байгуттиев, Курсан Асанов, Равшан Жеенбеков жана Улукбек Кочкоровдор шайлоо алдындагы программаларын тааныштырып, суроо-жооптор менен эфир курч талкууда өткөн болчу.

Бирок, эртеси бул дебат каналдын YouTube-баракчасынан “жоголуп” кетип, коомчулук чуу көтөргөндө, каналдын жетекчилиги тасма техникалык катачылыктардан улам алынып, салынганын, кайра жайгаштырылаарын түшүндүргөн эле.

Ал тургай бул боюнча БШКда да жыйын өтүп, каналга эскертүү берилген.

Финполдун башчысы Сыймык Жапыкеев ооруканага жаткырылды

Бишкек. 04.01.2021. informator.kg Кыргызстандагы экономикалык кылмыштарга каршы күрөшүү кызматынын(финпол) башчысы Сыймык Жапыкеев ооруканага жаткырылды. Бул тууралуу ал өзү соцтармактардагы баракчасына кабарлады.

“Достор баары жакшы, сахар кучоп, бугун которулуп кетти, ден соолука акыркы кундору катуу куч келип кетти  (нерв). Сахарды бир да окумуштуу айыктара албай койду. Эч жерин оорубайт, бирок бут органдарды жейт экен. Буюрса бир жума ден соолукту карап, анан ишке киришелик. Догдурга баш ийбесе болбойт, жаткырышты”,-деп жазды ал.

Эске сала кетсек, “Чоң казат” партиясынын лидери С. Жапыкеев 2020-жылдын 5-октябрындагы бийлик төңкөрүшүнөн кийин бул кызматка дайындалган.  

Кылкылдаган эл. Садыр Жапаров Сокулук, Москва, Жайыл райондорунун жана Кара-Балта шаарынын эли менен жолукту

Бишкек. 04.01.2021. informator.kg 2021-жылдын башында, 3 – январда Кыргыз Республикасынын Президенттигине талапкер Садыр Жапаров Чүй облусунун батыш тарабы, тактап айтканда Сокулук, Москва, Жайыл райондорунун жана ошондой эле Кара-Балта шаарынын эли менен жолукту. Жапаров менен жолугууга аталган райондордон  ми\деген жарандар келип катышышты. Алар Садыр Жапаровду жылуу тозуп алып,  талапкерге көптөн бери чечилбей, көйгөй жаратып келе жаткан суроолорун берип, жооп алышты.

Чынында башка облус, райондор сыяктуу эле Чүй облусунун район, айылдарында да көйгөй жараткан маселелер арбын экени маалым. Сары-Өзөн Чүйдө молчулук болсо, элде токчулук болоорун баса белгилеген Садыр Жапаров, чогулган эл менен саламдашып, амандашкан соң, жогоруда аты аталган райондордогу көйгөйлүү маселелердин орчундууларына токтолуп, Кудай буйуруп президент болуп шайланып калса,  көп жылдык көйгөйлөрдү чечүүгө аракет жасаарын, тилеги, максаты элдин жашоосун жакшыртып, өлкөнү өнүктүрүү экенин баса белгиледи.

Ал белгилегендей Кыргызстандын кайсы аймагына барба көйгөйлөрдүн эң орчундуусу жол жана суу маселеси. Өзгөчө алыскы региондордо биринчи эле көзгө союздан калган, тамтыгы чыгып, чаңы көккө сапырылган эски жолдор урунат. Анан албетте, көп айылдарда таза суу көйгөйү курч. Чүй облусунда дагы мына ушундай эле көйгөйлөр жыйырма жылдан бери чечилбей, элдин бийликке болгон ишеничин жокко чыгарып келгени белгилүү.        

 “Президент болуп шайланып калсам, социалдык көйгөйлөрдү чечүүгө бар күчүмдү жумшайм. Эң биринчи социалдык көйгөйдү чечиш керек. Аймактардын, айыл элинин жашоосу оңолсо, мамлекетибиз өнүгөт. Кудай буйурса президент болуп шайланып калсам, региондорго өзгөчө көңүл бурам. Мектеп, бала бакча, оорукана, маданият үйлөрүн жаңылоо боюнча инвесторлор менен сүйлөшүүлөр болгон. Жакшы пландарыбыз бар, республика боюнча 245 мектеп жараксыз абалда экен. Анын баарын жаңылашыбыз керек. Акырындык менен бардык маселени чечебиз. Ар бир региондун маселесин өз – өзүнчө папкага тиркеп жатам,  азыр сиздер айтып жаткан көйгөйдүн баары өзүнчө папкага тиркелет. Президент болуп калсам, ар бирине кылдат көңүл бурам” – деди Садыр Жапаров.

Ошондой эле Чүй облусу Казакстанга жакын болгондуктан, чек араны  б=лъп турган Чъй дарыясынын жээктерин оңдоо тууралуу да суроолор берилди.

“Чек ара кызматы УКМКнын карамагына өттү. Чек ара – мамлекеттик иш. Ага өзгөчө көңүл бурулат” – деди талапкер.

 Замир Сатаев атуу жаран “Бизде “Носоновское” деген алтын чыккан жер бар, ал жерди казганга көп чоңдор ар дайым кызыктар болуп келет, алар кенди казууга буга чейин көп жолу аракет кылып көрүштү,  бирок эл казууга жол берген жок.  Кен казылса экологияга чоң зыян алып келет. Президент болуп калсаңыз, ушул маселени чечип бериңиз”- деп суроо узатты.

Ага Садыр Жапаров: “Мындан ары кандай гана кен болбосун аны каздырбагыла. Жаратылыш байлыгын, кендерибизди ой келди каздырбоо боюнча мораторийге кол койгом. Ал мыйзам азыр күчүндө. Буга чейин көп кендер казылганы менен, мамлекетке жарытылуу пайда түшпөптүр. Ошондуктан, кендерди каздырбайбыз, ал эми буга чейин иштеп келген кен байлыктарга тийишпешибиз керек, алар иштесин, мамлекетибиздин экономикасын тезирээк көтөрүшүбүз керек” деп жооп берди Садыр Жапаров.

Чогулган элдин арасында Садыр Жапаровго суроо эле  бербестен, каалоо- тилек айткандары да арбын болду.

Алар буга чейинки президенттер  элди айдактап, күчкө салып, же болбосо акча таратуу жолу менен жолугууга алып келсе, бул жолу эл Садыр Жапаров менен жолугушууга өз каалоолору менен келип жатышканын, ага аябай ишеним артып, үмүттөнүп турушканын, Садыр Жапаров президент болсо, өлкө оңолоорун айтып жатышты. Талапкердин эл менен болгон жолугушуусунун аягы буга чейин болуп келгендей эле аксалдын алкоо тилеп бата берүүсү менен жыйынтыкталды.  

Аткаруучу: «informator.kg  » ; дареги: Кыргыз Республикасы, Бишкек ш., Кулатов көч: 8. Буюртмачы: Төлөгөнова Аида Бейшеналиевна, Кыргыз Республикасынын Президентинин кызматына талапкер Жапаров Садыр Нургожоевичтин каржы маселелери боюнча ыйгарым укуктуу өкүлү. Нускасы: 1. 2021-жылдын 03-январда даярдалды. Кыргыз Республикасынын Президентинин кызматына талапкер Жапаров Садыр Нургожоевичтин шайлоо фондунан каржы маселелери боюнча ыйгарым укуктуу өкүлү Төлөгөнова Аида Бейшеналиевна тарабынан төлөндү (күб. № 35, 16.11.2020-ж).

ИИМ министри У. Ниязбеков: “Президенттик шайлоого карата ИИМ 8-январдан тарта күчөтүлгөн тартипте иш алып барат”

Бишкек. 04.01.2021. informator.kg 2021-жылдын 4-январь күнү Кыргыз Республикасынын ички иштерминистри, милициянын полковниги Улан Ниязбеков Кыргыз РеспубликасынынПрезидентин шайлоону өткөрүү маалында коомдук коопсуздукту камсыздообоюнча ички иштер органдарынын бир катар жетекчилерине онлайн жыйынөткөрдү. Бул тууралуу ИИМдин маалымат кызматы кабарлады.

 Анда, онлайн-жыйынга министрдин орун басарлары, ИИМдин Борбордук аппаратынын тиешелүү кызматтарынын, Баткен, Ош, Жалал-Абад, Нарын, Ысык-Көл, Талас, Чүй облустук, Бишкек жана Ош шаарларынын ички иштер башкы башкармалыктарынын, башкармалыктарынын жетекчилери катышканы айтылат.

“Министр онлайн чогулушта шайлоо өнөктүгү учурунда коомдук тартиптип сакталышы, мыйзамдуулукту сактоо жана ар кандай тартип бузууларга өз убагында мыйзам чегинде ыкчам чараларды көрүү керектигин да белгилеп тапшырмаларды берди”,-деп айтылат маалыматта.

“ИИМдин атайын буйругуна ылайык Кыргыз Республикасынын Президентин шайлоону өткөрүү маалында коомдук коопсуздукту камсыздоо максатында 8-январдан баштап ички иштер органдарынын кызматкерлери күчөтүлгөн күжүрмөн даярдыкка өткөрүлөт. Атайын иш пландарга ылайык 11миңден ашуун кызматкерлер коомдук тартипти сактоого тартылат. Бүгүнкү күнү шайлоо тилкелерине бөлүнгөн 5000 ашуун кызматкерлер аныкталып, такталып шайлоо тилкелерин толугу менен кайтарууга алышты. Шайлоого даярдануу жана өткөрүү маалында иш-чараларды аткаруу милдеттерине көмөк көрсөтүү максатында БШК менен иш-алып баруу үчүн ИИМдин кызматтарынан кирген жумушчу топ ишмердүүлүгүн жүргүзүүдө”,-деп баса белгилеген министр.

   Ошондой эле, 2021-жылдын 2-январында “Учкун” ААКнын имаратында Кыргыз Республикасынын президентин мөөнөтүнөн мурда шайлоону өткөрүү жана Кыргыз Республикасынын референдумун өткөрүү үчүн даярдалган бюллетендерди Жалал-Абад, Ош, Баткен, Нарын, Ысык-Көл, Талас жана Чүй областтык, Бишкек жана Ош шаардык аймактык шайлоо комиссияларына, ошондой эле чет өлкөдөгү участокторго кабыл алуу жана өткөрүп берүү иш-чаралары өткөрүлгөнү, ага ылайык Ички иштер министрлигинин бюллетендер ИИМдин Жол кыймылынын коопсуздугун камсыздоо башкы башкармалыгынын кызматкерлери тарабынан жер-жерлерге жеткирилгендиги айтылган “Учкун” ААКсы бюллетендерди тынымсыз (күнү-түнү) басып чыгаруу процессине БШКнын мүчөлөрү, БШКнын аппаратынын бөлүмдөрүнүн кызматкерлери курамында турган жумушчу топ тарабынан жүргүзүлгөн. “Учкун” ААКсынын басмаканасына басылып чыккан бюллетендерди көзөмөлдөн (тестирлөөдөн) өткөрүп туруучу жабдуулардын топтому орнотулган. Коопсуздукту УКМК жана ИИМдин кызматкерлери камсыздашты. Учурда ИИМдин кызматкерлери Кыргыз Республикасынын Президентин шайлоону өткөрүү маалында коомдук коопсуздукту камсыздоого толугу менен даяр”,деп билдирет ИИМ

Спортчу Дастан Шаршеев “Газпром” спорт-комплексинин орун басар директорлугуна дайындалды

Бишкек. 01.01. 2021.informator.kg 2020-жылдын акыркы күнүндө Бишкек мэриясында бир топ кадрдык жүрүштөр орун алды. Алсак, “Газпром-балдарга” дене-тарбия жана ден-соолук комплексине Ишенбек Дүйшеев директор болуп дайындалды. Анын орун басарлыгына болсо мэрдин жардамчысы спортчу Дастан Шаршеев бекитилген.

Ошол эле учурда мэр Балбак Дүйшеевге жардамчы болуп Максимилиан Погиба аттуу жигит ишке киришти.

Садыр Жапаров: “Үлгүлүү сот системасын түзөбүз!”


Бишкек. 24. 12.20 informator.kg “Кыргызстанга “ак” же “көк” үйдүн коңгуроосу менен чечим чыгарбай турган көз карандысыз соттор керек. Алар чынчыл, коррупциялык иштерге катышы жок болууга тийиш. Эгерде эл мени президент кылып шайласа, анда Ак үй тарабынан сотторго эч кандай кысым болбойт, биз муну камсыз кылабыз. Буга биздин күчүбүз да, эркибиз да жетет”.

Садыр Жапаровдун сүйлөгөн сөзүнөн.

Акыркы жылдарда биздин өлкөдө болуп жаткан төңкөрүштөрдүн жана саясий тирешүүлөрдүн себептеринин бири – бул соттордун адилетсиздиги. Соттордун ишине биринчи кезекте бийликтин тең салмактуулугу көз каранды. Ошондуктан 2020-жылдын ноябрында түзүлгөн Конституциялык Кеңешменин башкы максаттарынын бири – сот реформасын жүргүзүү.

Конституциялык өзгөртүүлөр бийликтин жоопкерсиздигин жоюуга негиз болуп берет.

Садыр Жапаров соттордун ишин конституциялык деңгээлде кайрадан карап чыгууну жана үлгүлүү сот системасын түзүүнү колдойт.

“Сотторду реформалооротациялоо гана эмес, алардын иш механизмин жакышртуу. Аны менен бирге сот курамын жаңылоо – бул акырындык менен ишке аша турган процесс”, – деди С.Жапаров.

Садыр Жапаровдун премьер-министрлик жана президенттин милдетин аткаруучу кызматына келиши менен Кыргыз Республикасында экономикалык, социалдык, сот жана укук коргоо тармактарында реформа жүргүзүү боюнча активдүү иштер башталганын белгилей кетүүгө арзыйт. 

«Сот жана укук коргоо органдарынын дарегине көптөгөн дооматтар түшүүдө. Акыркы жылдар жана бүгүнкү күн – бул биздин улуттук муң кайгыбыз. Адамдар милициядан коркот, сотторго болсо ишеним жок. Өлкөбүздүн шайын оодарган коррупция эң эле коркунучтуу шишигин мына ушул чөйрөлөргө жайылткан. Сот жана укук коргоо органдары тезинен реформаланууга муктаж жана биз муну оңдоонун үстүнөн иштеп баштадык”, – деп белгиледи Садыр Жапаров.

Ал белгилегендей, 30 жылдык эгемендүүлүк мезгилинде адам ишмердүүлүгүнүн бардык тармактарына тамырлашып кеткен коррупцияны жоюу үчүн жана ошондой эле Кыргызстандагы пайдубалдуу эркиндиктерди өнүктүрүү жана жайылтуу үчүн коррупцияга каршы талыкпаган күрөш негизинен ачык-айкын иштеген соттор аркылуу жүргүзүлүүгө тийиш.

“Сот системасына кандай реформа керек? Учурда бул боюнча Конституциялык кеңешмеде талашып-тартышуулар жүрүп жатат. Конституциянын долбоору референдумга коюлат. Андан кийин элдин келечеги, мамлекеттин кызыкчылыгы үчүн реформалар уланат. Албетте сот реформасын мен жалгыз ишке ашыра албайм. Ошондуктан сот системасын жана сот өндүрүшүн ичинен жакшы билген жана түшүнгөн адамдарды чогултабыз. Сотторду мына ошолор аркылуу тандайбыз жана андан кийин дайындай баштайбыз.  

Конституциялык өзгөртүүлөр бизге БИЙЛИКТИН ЖООПКЕРСИЗДИГИН ЖОЮУГА негиз болуп берет!

КЕЛЕЧЕККЕ КЫЗМАТ БҮГҮНДӨН БАШТАЛАТ!


САДЫР ЖАПАРОВ ҮЧҮН!

  №1 ҮЧҮН!

Кененирээк www. zhaparov.kg сайтынан окуңуздар

Аткаруучу: « informator.kg » ; дареги: Кыргыз Республикасы, Бишкек ш., Кулатов көч: №8

Буюртмачы: Төлөгөнова Аида Бейшеналиевна, Кыргыз Республикасынын Президентинин кызматына талапкер Жапаров Садыр Нургожоевичтин каржы маселелери боюнча ыйгарым укуктуу өкүлү.

Нускасы: 1. 2020-жылдын 25-декабрьда даярдалды.

Кыргыз Республикасынын Президентинин кызматына талапкер Жапаров Садыр Нургожоевичтин шайлоо фондунан каржы маселелери боюнча ыйгарым укуктуу өкүлү Төлөгөнова Аида Бейшеналиевна тарабынан төлөндү (күб. № 35, 16.11.2020-ж).