Коом

Коом

УКМК: Кылыч Саркарбаев мамлекетке келтирген 1 млн. сом чыгымды төлөп берди

Бишкек. 19.01. 12 informator.kg  УКМКнын Башкы тергөө башкармалыгынын Ош облусу жана Ош шаары боюнча тергөө тобу Ош шаарынын дене тарбия жана спорт комитетинин мурдашы башчысы Кылыч Саркарбаевдин  үстүнөн кылмыш ишин козгогону белгилүү.

Бүгүн башкы коопсуздук органы К. Саркарбаев кызмат абалын пайдалануу менен спорттук иш-чараларга арналган шаардык бюджеттин каражатын мыйзамсыз кымырып алганын мойнуна алганын жана келтирилген чыгымды кайра мамлекеттик казынага төлөп бергенин кабарлады.

“Кылмыш ишин сотко чейинки өндүрүшкө алып тергөө маалында, атайын аудиттик текшерүүдөн кийин такталган 1 миллион сом өлчөмүндөгү ош шаардык мэриясынын бюджетине келтирилоген чыгымды К. Саркарбаевдин жакындары өз ыктыяры менен кайтарып берди”,-деп айтылат маалыматта.

Учурда болсо бул иш тергелип, юридикалык баа берүү алдында турат.

“Жалалабат электр” ААКнын бөлүм башчысы пара менен кармалды

Бишкек. 19.01. 12 informator.kg  “Жалалабат электр” ААКнын бөлүм башчысы пара алып жаткан жеринен финполдун кызматкерлери тарабынан кармалды. Бул тууралуу аталган органдан кабарлашты.

Анда, Жалал-Абад облусунун Базар-Коргон, Ноокен, Тогуз-Торо, Сузак райондору жана Жалал-Абад шаары боюнча финансы полициясына жеке ишкер “Жалалабат электр” ААКнын бөлүмдөрүнүн биринин башчысына карата арыз менен кайрылганы, ал башчы кызмат абалынан пайдаланып, арыз ээсинен жеткирүү келишиминин негизинде жеткирилген товардык-материалдык баалуулуктарды (ТМБ) кабыл алуу үчүн 90 миң сом суммасында акча каражаттарын опузалап талап кылганы айтылат. Арыз ээсинин айтымында, аталган бөлүмдүн башчысы андан дайыма акча талап кылып келген жана ТМБны ар бир жеткирип берген сайын акча алып турган.

“Бул факт Кылмыштардын жана жоруктардын бирдиктүү реестрине Кыргыз Республикасынын Жазык кодексинин 238-беренесинде (кызматчынын мыйзамсыз сый акы алуусу) каралган кылмыштын белгиси боюнча катталып, сотко чейинки өндүрүш иши башталды.

Үстүбүздөгү жылдын 14-январында, тиешелүү иш-чараларды жүргүзүү учурунда, опузалап талап кылынган акча каражаттарынын бир бөлүгүн (40 миң сом өлчөмүндө) алып жаткан жеринен, кылмыш үстүнөн “Жалалабат электр” ААКнын темир-бетон буюмдарын даярдоо цехинин башчысы “К.Б” кармалды”,-деп билдирет финпол.

Учурда, сотко чейинки өндүрүш иштери жүрүп жатат.

Мурдагы башкы ветинспектор Калысбек Жумаканов кармалды

Бишкек. 19.01. 12 informator.kg  Улуттук Коопсуздук боюнча Мамлекеттик Комитет тарабынан КРнын Ветеринардык жана фитосанитардык көзөмөл боюнча мамлекеттик инспекциясынын мурдагы директору Калысбек Жумаканов кайра кармалды. Бул тууралуу башкы коопсуздук органынан кабарлашты.

Андагы маалыматтарга караганда, К. Жумаканов аталган инспекцияны жетектеп турган 2017-2020-жылдар аралыгында ветеринардык дары-дармектерди алуу боюнча мамлекетке пайдасыз келишимдерди түзүү менен казынага 90 млн. сомдон ашык чыгым алып келгени, мындан тышкары талапка ылайык келбеген адамдарды жоопту кызматка мыйзам бузуу менен дайындаганы айтылат.

Ошону менен бирге эле ал жетекчи болуп турган маалда, инспекциянын кызматкерлерине сый акы берүүдө мыйзамсыз 600 миң сомго чейинки каражаттарды туруктуу түрдө чогултулуп келгени да кошумчаланган.  

Эске сала кетсек, ал 2020-жылдын ноябрь айында кармалып, саламаттыгынан улам үй камагына чыгарылган болчу

“Ош Электр” ААКтын жетекчилиги бюджетке 30 млн. сом суммада зыян келтирген

Бишкек. 19. 01. 21. Informator.kg Финансы полициясынын Ош шаары боюнча башкармалыгы коммерциялык же башка уюмдагы ыйгарым укуктарын кыянаттык менен пайдалануу фактысы боюнча “Ош Электр” ААКга карата сотко чейинки өндүрүштү баштады. Бул тууралуу финполдон билдиришти.
“Аталган ААКтын жооптуу адамдары Мамлекеттик мүлк фонду менен макулдашпай туруп, (аянты 1665,0 чарчы метр жер тилкесинде жайгашкан, жалпы аянты 619,66 чарчы метр болгон административдик имаратты сатышкан) Энергия сатуунун мурунку административдик имаратын жана ага жанаша жайгашкан жер тилкесин 8 миллион сомго сатышканы аныкталды (болжол менен 100 миң АКШ доллары), аны сатуу учурундагы ушул сыяктуу жер участогунун орточо базар баасы 1 сотук жер үчүн болжол менен 30 миң АКШ долларын түзгөн.
Ошентип, “Ош Электр” ААКтын мыйзамсыз иш-аракеттеринин натыйжасында мамлекеттик бюджетке 30 миллион сомдон ашык суммада өзгөчө ири өлчөмдө зыян келтирилген”,-деп айтылат маалыматта.
Учурда, “Ош Электр” ААКтын жооптуу адамдарын жоопкерчиликке тартууга, ошондой эле мамлекеттик бюджетке келтирилген акчалай зыяндын ордун толтурууга багытталган тиешелүү иш-чаралардын комплекси жүргүзүлүп жатат.

Финполчу Сыймык Жапыкеев Бишкек ЖЭБин текшерди

Бишкек. 18.01.21. informator.kg КРнын Экономикалык кылмыштарга каршы кызматынын(финпол”) башчысы Сыймык Жапыкеев бүгүн мурда козголгон кылмыш ишинин алкагында Бишкек ЖЭБин текшерип кайтты.

Ал а дегенде ЖЭБин көмүр түшүрүлгөн аймагын кыдырып, андан кийин буу казандар иштеп жаткан имаратка баш бакты. “Миң уккандан бир көргөн демекчи, булар кандай көмүр жагып жатышат, фильтрлер кандай иштейт, жылуулук трассалары кандай иштеп жатат, көрүп кетейин”,-деди ал.

Финполчуларды каршы алган ЖЭБдин жетекчилиги, ишкана модернизация болгондон тарта үзгүлтүксүз иштеп жатканын, мурдагыдай авариялык абал катталбаганын, түтүндүн курамы, зыяндуулугу боюнча текшерүүлөрдүн жыйынтыгы канааттандырып жатканын айтышты.

«Эгер, тендердик документтерди толтурууда, көмүр менен камсыздоо боюнча конкурстарда мыйзам бузуулар аныкталса, ал өзүнчө соттук өндүрүшкө алынат. Бүгүнкү иш сапардын максаты-өз көзүбүз менен мындагы иш процесс менен таанышып, коомчулук талап кылган жагдайларды ачыктоо. Биз иликтөөлөрдүн жыйынтыгын жашырбайбыз, түтүн, ышка ким күнөөлүү экенин аныктап чекит коюшубуз керек”,-дейт финполициянын тергөө башкармалыгын башчысы Куанычбек Рысбаев.

Саламаттыкты сактоо министрлиги Алмазбек Атамбаевдин дартына так аныктама коет

Бишкек. 18.01.21. informator.kg Бүгүн, Бишкек шаарынын Биринчимай райондук сотунда мурдагы президент Алмазбек Атамбаевдин үстүнөн козголгон иши боюнча соттук териштирүү уланып, бирок, ага айыпталуучу алынып келинген жок. Анын ооруп жатканын билдирген жакточулары соттон мурдагы өлкө башчынын саламаттыгы боюнча атайын комиссия түзүү өтүнүчүн келтирди.

Сотко төрагалык кылуучу Азирет Медеров жактоочулардын өтүнүчүн канааттандыруудан баш тартып, бирок, Саламаттыкты сактоо министрлигине А, Атамбаевдин дартын аныктап, анын сотко катыша алаар-албасын аныктаган аныктама беришин сураган кат жолдоноорун билдирди.

Равшан Сабиров, КРнын вице-премьер министри: “Өкмөт үчүн өндүрүштү, экспорттук потенциалды көтөрүү негизги приоритеттердин бири”

Бишкек.18.01.21 informator.kg “Кыргыз өкмөтү үчүн өлкөнүн өндүрүш тармагын, экспорттук потенциалды көтөрүү негизги приоритеттердин бири. Биз бул тармакка колдон келген колдоону көрсөтөбүз”. Бул тууралуу КРнын вице-премьер министри Равшан Сабиров “Бишкек” Эркин Экономикалык аймагынын генералдык директору Кудрет Тайчабаров менен жолукканда билдирди.
Ишканадан өндүрүлүп чыгып жаткан сапаттуу продукциялар менен көргөзмө борборунда таанышып жатып, өкмөт башчынын орун басары Кыргызстандагы эркин экономикалык аймактардын өнүгүшүнө жеткиликтүү шарттар түзүлө турганын айтты.


“Бүгүнкү жыйында биз негизинен эки маселени, ЭЭАлардын аймагына өндүрүшкө керектүү болгон сырье жана жарак-жабдыктарды үчүнчү өлкөлөрдөн бажы төлөмдөрүсүз алып кирүүдө жана өндүрүлгөн товарларды сыртка сатууда депозиттик эсепке каражат салып, кепилдендирүү боюнча маселелерди угуп, аны чечүү жана жалпы эле эркин экономикалык аймактарды өнүктүрүү стратегиясын иштеп чыгуу боюнча топ түзүп, иешелүү ведомстволордун өкүлдөрү менен бирге иштешүү тапшырмасын койдук. Ошону менен бирге эле өндүрүшчүлөргө жаңы жумушчу орундарды ачуу жана өндүрүштүн көлөмүн арттыруу үчүн Өкмөт тараптан жетиштүү жардам берип, колдоо көрсөтүү керектиги тууралуу кабардар болдук. Биз ар ай сайын атамекендик продукция чыгаруучулар менен тегерек стол уюштуруп, келип чыккан маселелерди мүмкүн болушунча тез арада чечүү, мыйзамдык базасын жакшыртуу боюнча иштейбиз”,-деди министр Равшан Сабиров.
Өз кезегинде, “Бишкек” ЭЭАсынын генералдык директору Кудрет Тайчабаров эң негизгиси ишкана -ички жана сырттан келген инвесторлор үчүн өндүрүш аянтчасы катары иш алып барып, экспортко багыт алган өндүрүштүн локомативи катары ишмердик жүргүзүүсү керектигин, бирок, улам ЭЭАлар тууралуу мыйзамдар өзгөртүүгө дуушар болуп жатып, азыр эркин экномикалык аймактын ичинде иштеген өндүрүш менен сырттагы жеке менчик аймактардагы өндүрүшчүлөрдүн айырмасы дээрлик болбой калганын баяндады.
“Равшан Азатович, албетте, азыр өлкөдө абал түшүнүктүү, өкмөткө каражат керек, салык, бажы кызматтары көбүрөөк төлөмдөрдү казынага буруунун аракетинде. Ошентсе да, ЭЭАлардагы субьектилерге мамиле, мыйзам башкача болушу керек. Анткени, биздеги өндүрүшчүлөр, сырьего бажы төлөмдөрүнөн бошотулганы менен, алар канчалык көп жумушчу орундарын түзсө, экспортко товар чыгарса, салыктан көбүрөөк пайда, башкысы, “Кыргызстанда өндүрүлгөн” деген брендди жайылтып, ЕАЭБдин жана андан тышкаркы өлкөлөрдүн базарларынан Кыргызстандын өндүрүшчүлөрүнө орун таап, мамлекеттин кадырын арттырып жатат”,-деди К. Тайчабаров.
Жыйынтыгында, Өкмөт тарабынан “Бишкек” ЭЭАсынын жетекчилиги ЭЭАлардын өнүгүү стратегиясын тиешелүү министрликтер менен бирге ишкана иштеп чыгып, өкмөттүн кароосуна сунуштамак болду.

Жергиликтүү соттордун жаңы судьялары ант берди. Арасында Р. Матраимовдун мурдагы актоочусу да бар

Бишкек. 12.01. 12 informator.kg Бүгүн Жогорку сотто  2021-жылдын 11-январында  Кыргыз  Республикасынын  Жогорку сотунда, Кыргыз Республикасынын Президентинин  милдетин аткаруучу, Кыргыз Республикасынын Жогорку Кеңешинин төрагасы Талант Мамытовдун   2021-жылдын 5-январындагы №  1, 2 жана 3 Жарлыктары менен менен жергиликтүү сот органдарына судья болуп шайлангандар ант беришти. Бул тууралуу Жогорку соттон кабьарлашты.

Анда Бишкек шаарынын Свердлов райондук сотуна Түмөнов Алтынбек Жаңыбаевич,

— Бишкек шаарынын Октябрь райондук сотуна:

Жарматова Айдай Жарматовна;

Жолдошбаев Мирлан Эргешбаевич.

Свердлов райондук сотуна:

Абыкеев Таалайбек Капарович;

Байдаева Лейла Алиевна.

Ленин райондук сотуна:

Өмүралиев Мелис Асанбекович;

Тентимишов Марлен Бактыгулович.

Ысык-Көл облустук сотуна:

Мырзаканова Бермет Низамидиновна.

Нарын облустук сотуна:

Алыбаев Замир Эрнисбекович дайындалып, ант беришти.

“Алардын антын алган Кыргыз  Республикасынын  Жогорку сотунун  төрайымынын милдетин аткаруучу Нургуль Бакирова  жаңы дайындалган  судьяларды  куттуктап, берген антка бек турууга  чакырды” деп айтылат маалыматта.

Алмаз Атамбаевдин небереси олимпиадада алтын медаль утту

Бишкек. 12.01. 12 informator.kg  12 жаштагы Селим Атамбаев Эл аралык математика боюнча олимпиадада “Талантуулугу үчүн медаль” алтын  медалын утуп алды. Бул тууралуу жергиликтүү ММКлар жазышууда.

Анда 61-жолу өтүп жаткан  Эл аралык метаматикалык олипмпиада (World Mathematic Invitational) бул жолу Россиянын Санкт-Петербург шаарында өтүп, анда 100дөн ашуун өлкөдөн келген жогорку класстын математик окуучулары эки күн бою эсеп чыгарууда атаандашып, ар бир катышуучу 6 тапшырманы аткарышканы, алардын арасынан кыргызстандык экс-президент Алмаз Атамбаевдин небереси баарынан озуп чыкканы кабарланат.

Эске сала кетсек, буга чейин Селим Малазияда өткөн ушул олимпиадада 3-орунга татыктуу деп табылса, 2019-жылы Чолпон-Ата шаарында тхеквондо боюнча алтын медальды жеңип алган.

Москва районунда адамды сабап, акча талап кылган кылмышкер кармалды

Бишкек. 12.01. 12 informator.kg  “Москва районунан бирөөнү сабап акча талап кылган деген шек менен мурда соттолгон жаран кармалды”. Бул тууралуу Чүй ОИИББдин басма сөз кызматы билдирет.

“2021-жылдын 6-январь күнү Москва районунун ички иштер бөлүмүнө аймактык ооруканадан телефон чалуу болуп, 28 жаштагы Л.И. аттуу жаран денесине алган жаракаттарынан улам кайрылгандыгы тууралуу маалымат келип түшкөн. Бул маалыматтын негизинде окуя болгон жерге дароо Москва РИИБдүн ыкчам тергөө тобу чыгышып, териштирүү иштерин жүргүзүү учурунда төмөндөгүлөр аныкталган. Жабырлануучуга чала тааныш эркек киши өзүн уюшкан кылмыштуу топтордун биринин мүчөсүмүн деп тааныштырып, аны ур-токмокко алып, 100 000 сом акча талап кылган. Бул окуя кылмыштардын жана жоруктардын бирдиктүү реестрине катталып, сотко чейинки өндүрүш иштери башталган. Жогорудагы кылмыштын бетин ачуу үчүн тергөө кызматы тарабынан Чүй облусунун ИИББнын жана Москва районунун ИИБдүн криминалдык милиция кызматкерлерине тапшырмалар берилген. Жүргүзүлгөн ыкчам тергөө иш-амалдарынын негизинде Чүй облусунун ИИББдин жана Москва РИИБдүн криминалдык милиция кызматкерлери тарабынан шектүү жарандын өздүгү аныкталып, ИИМдин АБПнын атайын отрядынын кызматкерлеринин катышуусунда, шектүү жаран жабырлануучудан 10000 миң сом акча алып жаткан жеринен кармалган. Ал буга чейин соттолгон 25 жаштагы А.Т. аттуу болгон.Шектүүнү кароо учурунда жанынан жашыл түстөгү зат табылган”,-деп жазылат маалыматта.

Учурда кармалган жаран убактылуу кармоочу жайга камакка алынган. Анын үстүнөн сотко чейинки өндүрүш иштери улантылууда.