Спорт

Спорт Страница 3

УЕФАнын суперкубогун “Бавария” командасы жеңип алды

25-сентябрь 2020/informator/kg-

УЕФАнын суперкубогу үчүн “Бавария” менен “Севилья” командалары оюн өткөрдү. Бул тууралуу Чемпионат басылмасы жазат. “Пушкаш Арена” стадионунда өткөн оюнда “Бавария” клубу атаандашын 2:1 эсебинде жеңип алды. Оюн башталганда эле “Севильянын” оюнчусу Лукас Окампос гол киргизди. Ал эми беттештин 34-мүнөтүндө германиялык клубдун футболчусу Леон Горецка гол жаратканга жетишти. Оюндун кошулуп берилген убактысында, 104-мүнөтүндө “Бавариянын” оюнчусу Хавьер Мартинес өзүнүн командасына жеңиш алып келген голду киргизди. Эсеп 2:1 Белгилей кетсек, “Бавария” клубу өзүнүн тарыхында экинчи ирет УЕФАнын суперкубогун жеңди.

Кыргыз мушкери Бахрейнде өтө турган турнирге катыша албай калды

23-сентябрь 2020/iinformator.kg

Кыргыз мушкери Рыскулбек Ибраимов– Эртең, 24-сентябрда Бахрейнде өтө турган “BRAVECF 42” эл аралык турнирине катыша албай калды.
Маалыматка ылайык, Рыскулбек Ибраимов Бахрейнге коронавирус пандемиясынан улам бара албай калган. Бул турнирде Кыргыз мушкери орусиялык күчтүү делинген 26 жаштагы Касум Касумов менен беттешмек. Эки мушкердин беттеши жокко чыгарылды.
Рыскулбек Ибраимов өзүнүн карьерасында жалпы 21 беттешке катышып, 17 жолу жеңүүчү аталса, 4 жолу жеңилүү ызасын тарткан.

Жеңилбес мушкер Флойд Мейвезер белгилүү YouTube блогери Логан Пол менен беттешет

19-сентябрь 2020/informator.kg-Атактуу америкалык жеңилбес мушкер Флойд Мейвезер белгилүү YouTube блогери Логан Пол менен беттеш өткөрөт. Бул тууралуу блогердин жакын досу билдиргенин чет элдик басылмалар жазышууда. “Мейвезер быйыл Логан Пол менен беттешет! Мен тамашалаган жокмун. Логан азыркы учурда беттешке кызуу даярданып жатат”, – деген блогердин досу. 25 жаштагы Пол алгачкы жолу рингге 2019-жылдын ноябрында чыгып, дагы бир KSI аттуу YouTube блогерине жеңилип калган. 43 жаштагы Мейвезер карьерасын 1996-жылы баштаган. Ал акыркы беттешин 2017-жылдын август айында атактуу ирландиялык мушкер Конор Макгрегорго каршы өткөрүп, техникалык нокаут менен жеңип алган. Мейвезер жалпы карьерасында 50 беттеш өткөрүп, баарында жеңишке жетишкен (анын 27си нокаут менен).

Бүгүн спорт чеберлери өз наамдарын алышты

15-сентябрь 2020/informator.kg-

Спорттун бир нече түрү боюнча спортчуларга “Кыргыз Республикасынын эл аралык класстагы спорт чебери” жана “Кыргыз Республикасынын спорт чебери” наамдары ыйгарылды. Бул тууралуу Жаштар иштери, дене тарбия жана спорт мамлекеттик агенттигинен билдиришти.Агенттик билдиргендей, “эл аралык класстагы спорт чебери” наамын Валерия Качалко (бий спорту) алган. Ал эми “Кыргызстандын спорт чебери” наамы Эркайым Жапарова (таэквон-до WTF), Бакдаулет Эгембердиев (грек-рим күрөшү), Даулет Айдарбеков (грек-рим күрөшү), Эламан Базарбек уулу (белбоо күрөшү), Сыймык Мелис уулу (белбоо күрөшү) жана Уланай Салиевага (дзюдо) ыйгарылган.

Дональд Трамп Хабиб Нурмагомедовду дүйнөдөгү эң мыкты мушкер деп атады

15-сентябрь 2020/informator.kg-АКШ президенти Дональд Трамп орусиялык мушкер Хабиб Нурмагомедовду салмак категорияга карабастан дүйнөдөгү эң мыкты мушкер деп атады. Бул тууралуу президент UFC уюмунун президенти Дана Уайт жана шайлоочулар менен жолугушуу учурунда айткан. “Мен сизге дагы бир мыкты мушкер Жастин Гэйтжи жөнүндө айткым келет. Ал дүйнөдөгү эң мыкты мушкер менен беттешкени жатат. Ал Хабибди техникалык нокаут менен утаарын айтты. Мен бул беттешти сөзсүз көрөм. Ишенсеңер болот, бул укмуштуудай беттеш болот”, – деген Трамп. Белгилей кетсек, UFC мушкерлеринин рейтингинде Хабиб Нурмагомедов америкалык мушкер Жон Жонстон кийин экинчи орунда турат. Нурмагомедов-Гэйтжи беттеши 24-октябрда Абу-Даби шаарында көрүүчүлөрсүз өтөт.

Грек-рим күрөшүнүн чемпиону өлүм жазасына тартылды

13-сентябрь 2020/informator.kg-

Ирандын 27 жаштагы жараны, грек-рим күрөшү боюнча чемпион Навид Афкарини сот өлүм жазасына тартты. Бул тууралуу эл аралык басылмалар, ирандык маалымат каражаттарына таянып жазып жатышат.Маалыматка ылайык, Афкариге 2018-жылы өткөн өкмөткө каршы митингдерде активдүү катышып, адам өлтүргөн жана бийликти кулатуу үчүн атайын топторду уюштурган деген күнөө тагылган.Афкарини 12-сентябрь эрте менен үй-бүлөсү катышкан соттук процедуралардан кийин өлүм жазасына тартканын жергиликтүү маалымат каражаттары билдирди.Ирандын мындай кадамын көптөгөн спорт уюмдарын тынчсыздандырып, ага ырайым кылууну өтүндүрдү. Андан тышкары АКШнын президенти Дональд Трамп дагы өзүнүн твиттердеги баракчасына Ирандын бийлигине Афкаринин өмүрүн сактап, аны тынч койсо ыраазы болорун билдирген.

Хабиб Нурмагомедов: “Беттешке даярдануу үчүн атамдын жоктугу даана байкалып жатат”

7-сентябрь 2020/informator.kg

UFC уюмунун чемпиону орусиялык мушкер Хабиб Нурмагомедов 24-октябрда UFC 254 турнири өтө турган жерди атасы Абдулманап Нурмагомедов катышышы үчүн тандаганын орусиялык басылмаларга берген маегинде айтты. “Мен Гэйтжи менен боло турган беттешке келишим түзгөндө, Абу-Дабиде же Лас-Вегаста өтөт деген эки вариант бар болчу. Мен Абу-Дабини тандадым. Анткени менин атамдын бул беттешке катышуу мүмкүнчүлүгү бар эле. Келишим түзүлгөндөн кийин атам каза болду. Эми биз беттеш өтө турган жерди өзгөртө албайбыз. Беттешке даярдануу үчүн атамдын жоктугу даана байкалып жатат. Бирок биз эмне кыла алабыз? Муну кабыл алышыбыз керек. Башка айла жок. Мен машыгуумду мурдагыдай эле улантып жатам”, – деген Нурмагомедов. Хабиб Нурмагомедов менен Жастин Гэйтжинин беттеши UFC 254 турниринин алкагында 24-октябрь күнү Абу-Даби шаарында өтөт.

Австриялык спортчу муз менен курчалган айнекте отуруп дүйнөлүк рекордду жаңылады

7-сентябрь 2020/informator.kg– Австриялык экстремалдуу спорттун сүйүүчүсү Йозеф Кёберл муз менен курчалган айнекте 2 сааттан ашык отуруп, дүйнөлүк рекорд жаратты. Бул тууралуу чет элдик басылмалар жазышып, эксперименттин видеосун жарыялашты. Рекордду ишке ашырууда 200 килограмм муз колдонулганы айтылат. “Эксперименттин жүрүшүндө спорт сүйүүчүсү денесин жан чыдагыс оору каптаганын жашырган эмес. Бирок ал жакшы, позитивдүү нерселерди ойлогонго аракет кылганын айткан. Натыйжада Йозев муз толтуралган айнекте 2 жарым саттан ашык отурган. Муну менен ал, мурдагы өзүнүн эле рекордун 20 мүнөткө ашык аткарган. Эксперименттин дагы бир максаты – дүйнө жүзү боюнча муздардын эрип жатканы тууралуу көйгөйгө көңүл бурдуруу экени белгиленген” , – деп жазылат маалыматта.

Шевченконун атаандашы Майянын жеңишке жетүүгө мүмкүнчүлүгү аз

27-август 2020/informator.kg-

Букмекерлердин баамында, кыргызстандык Валентина Шевченко менен беттеше турчу бразилиялык Женнифер Майянын жеңишти камсыздоого мүмкүнчүлүгү өтө эле аз.Майя менен Шевченко UFC 255 турниринин алкагында 21-ноябрда (Бишкек убактысы боюнча 22-ноябрда) кармашат. Мелдештин өтө турчу жери айтыла элек. Анда кыргызстандык спортчу жеңилирээк салмактагылар арасында чемпиондук наамын төртүнчү ирет коргомокчу.”Марафонбет” букмекердик конторасы мындай коэффициенттерди койгон: кыргызстандык спортчунун жеңиши үчүн — 1,068, бразилиялык мушкер үчүн — 9. Ал эми Favbet конторасында коэффициенттер бир аз айырмаланат:  1,08 жана 9,5.Белгилей кетсек, коэффициент канчалык төмөн болсо, жеңишке жетүү мүмкүнчүлүгү ошончолук жогору болот.Буга чейин Валентина катыша турчу турнирде анын эжеси Антонина Шевченко дагы күч сынашары айтылган. Анын атаандашы бразилиялык спортчу Ариана Липски болмокчу.

Булак: NazarNews.kg

Спорт агенттигинин жаңы жетекчиси жумушка дайындалды

26-август 2020/informator.kg-

Дене тарбия жана спорт боюнча мамлекеттик агенттиктин директорунун кызматтык ыйгарым укуктарын аткаруу Парханов Мирлан Абдивалиевичке өткөрүлдү. Бул тууралуу өкмөттүн басма сөз кызматы билдирди.Мирлан Парханов аталган агенттиктин директорунун орун басары болуп иштеп жаткан.Буга чейин “Кыргыз Республикасынын президентин жана Кыргыз Республикасынын Жогорку Кеңешинин депуттарын шайлоо жөнүндө” конституциялык мыйзамдын 21-беренесине ылайык,  бул агенттиктин директору Аманкулов Канат Маратовичтин кызматтык ыйгарым укуктарын аткаруусу шайлоонун натыйжалары аныкталганга чейин токтотулган.