Дүйнөдө

Дүйнөдө

Кыргызстан шайлоо өткөрүү үчүн Түркиядан 100 миң доллар жардам сурады

17-сентябрь 2020/informator/kg-

Түркия Кыргызстандын шайлоо өткөрүү боюнча техникалык колдоо көрсөтүү өтүнүчүн канааттандырып, 100 миң долларлык жардам көрсөтөт. Бул тууралуу Түркиянын Кыргызстандагы элчилигинин басма сөз кызматы билдирди. Маалыматта айтылгандай, Кыргызстан тарап буга чейин шайлоочуларды идентификациялоочу аппараттарды жана добуш берүү үчүн автоматтык урналарды алуу үчүн Түркияга кайрылган. Түрк бийлиги бул өтүнүч канааттандырып, жалпы суммасы 100 миң долларлык жардам көрсөтөт. Ошондой эле Түрк кызматташтык жана координациялоо агенттиги да 21 күч кызматкерин шайлоодогу коопсуздук чараларын сактоо боюнча окутуудан өткөргөн. Мындан сырткары Түркия Кыргызстанда 4-октябрда өтө турчу шайлоого байкоочуларын да жиберет.

Алексей Навальный Орусияга кайтып келет

16-сентябрь 2020/informator.kg-

Ууландырылды деп айтылган оппозициячыл саясатчы Алексей Навальный Орусияга кайтып барууну каалайт. Бул тууралуу саясатчынын басма сөз катчысы Кира Ярмыш билдирди. “Журналисттер тынымсыз жазып жатат, “Навальный чын эле Орусияга кайтып келеби” деген суроо жолдошууда. Мен кайрадан тактап кетейин: башка варианттар эч каралган эмес”,-деп жазды Ярмыш “Твиттер” баракчасына. Навальный болсо “Инстаграм” баракчасына сүрөт жарыялап, өз алдынча дем алып жатканын билдирди. “Силерди сагындым. Азыр көп нерсени жасай албайм, бирок өз алдынча деп алып калдым. Эч кандай жардам беришкен жок, түтүктөр колдонулган жок. Өз алдынча дем алуу керемет экен, аны көптөр баалабайт. Силерге дагы өз алдынча дем алууну сунуштайм!”,-деп жазган Навальный.

Тажикстанда коомдук жайларда беткап тагынбаган 2600дөн ашык кишиге айып салынды

16-сентябрь 2020/informator.kg-

Тажикстанда санитардык-гигиеналык эрежелердин сакталышын көзөмөлдөөгө багытталган жаңы жоболордун негизинде 2 600 кишиге айыппул салынды. Быйыл июлда өлкөнүн Административдик кодексиндеги эки беренеге өзгөртүүлөр киргизилген. Анда гигиена эрежелерин сактабагандарга, анын ичинде коргоочу беткап тагынбагандарга айыппул салуу жазасы каралган. Бийлик мындай өзгөртүүлөр өлкөдө коронавирус инфекциясынын жайылуусун алдын алуу үчүн киргизилгенин билдирген. Тажикстан Ички иштер министрлигинин маалыматына караганда, айыппул салынган 2 600 кишинин көбү коомдук транспорттордо, базарларда жана дүкөндөрдө беткапсыз жүргөндүгү үчүн жазаланган. Жаңы жоболордо беткап тагынбагандарга 116-290 сомони (11-29 доллар), кооптуу жугуштуу ооруларды жайылткандарга 2 жылдан 5 жылга чейин эркинен ажыратуу жазалары каралган.

Тартуу иштерине кыргыз операторлору катышкан. Казак элинин “Томирис” тасмасы Париждеги кинофестивалда баш байгени утуп алды

16-сентябрь 2020/informator.kg-

Казакстандык режиссёр Акан Сатаевдин “Томирис” тасмасы Париждеги “L’Étrange” фестивалда Гран-прини утуп алды. Аталган тасманы тартууну кыргыз операторлору Хасан Кыдыралиев жана Жантай Кыдыралиев колго алышкан. L’Étrange кинофестивалы 2-сентябрдан 13-сентябрга чейинки аралыкта Парижде өттү. Аталган тасманын бет ачары коңшу өлкөдө 2019-жылдын 25-сентябрында болгон.

Орусиялык алып баруучу Артур Цветков Ассоль Молдокматованын үстүнөн арыз жазып, сотко кайрылды

16-сентябрь 2020/informator.kg-

Орусиялык алып баруучу, шоумен Артур Цветков Ассоль Молдокматованын үстүнөн Москва шаарынын сотторунун бирине доо арыз менен кайрылды. Бул тууралуу Цветков өзүнүн социалдык тармактагы баракчасына жазып чыкты.

“Дагы бир жолу мындан бир ай мурун болуп өткөн кырдаалга кайтып келейин. Анда мени менен Кыргыз өлкөсүнүн жараны ортосунда келишпестик орун алган. Бирок түшүнбөстүктөр чечилип, кол алышканбыз. Чырдын тынчтык жолу менен чечилгени кээ бирлерине жакпай калыптыр. Тагыраагы, коомдук ишмер Ассоль Молдокматова окуяга башкача өнүгүү берүүнү чечти. Ошондуктан кырдаалдын мындан ары тутанып кетишин болтурбоо максатында, биз Москва шаарынын жактоочулар тобу менен биргеликте соттордун бирине доо арыз менен кайрылдык. Аталган келишпестик укуктук талаада чечилет деп үмүттөнөбүз”, – деп билдирүү калтырган Артур Цветков.Мындан тышкары Артур Цветков 21-сентябрда Москва шаардык сотунда Орусия Думасынын депутаттары жана искусство адамдарынын катышуусунда пресс-конференция өткөрүүнү пландап жатканын билдирген.

Apple кандагы кычкылтекти өлчөгөн «акылдуу сааттарды» чыгарды

16-сентябрь 2020/informator.kg- Apple компаниясы кандагы кычкылтекти өлчөгөн «акылдуу сааттарды» чыгарды. Бул тууралуу ВВС орус кызматы жазды. Apple салтка айланып калгандай, күз мезгилинде жаңы гаджеттери менен тааныштырды. Бул жылы компания iPhone телефонунун жаңы моделин көрсөткөн жок. Бирок кандагы кычкылтектин көлөмүн өлчөй алган «акылдуу сааттардын» жаңы модели сатыкка чыгарын билдирди. Быйыл Apple компаниясы коронавирус пандемиясына байланыштуу iPhone 12 телефонун чыгарууну токтотуп турууну чечкен. Анын ордуна жаңы Apple Watch Series 6 сааты сатыкка чыгат.

Дүйнөлүк саламаттыкты сактоо уюму: “Дүйнөдө карантин кайрадан жарыяланышы мүмкүн”

15-сентябрь 2020/informator.kg-

Коронавирус пандемиясынан улам дүйнөдө карантин кайрадан жарыяланышы мүмкүн. Бул тууралуу Дүйнөлүк саламаттыкты сактоо уюмунун (ДССУ) башчысы Тедрос Аданом Гебреисус ДССУнун Европадагы Регионалдык бюросунун сессиясында айткан. “Биз көптөгөн адам өмүрүнөн, экономикабыздан айрылдык. Дүйнөлүк экономика коркунучта болуп жатат. Пандемия көптөгөн өлкөлөргө катуу таасир этүүдө. Учурда оорулардын күнүмдүк саны март айындагы эң жогорку мезгилге салыштырмалуу көп. Каза болгондордун саны дагы жетиштүү деңгээлде кала берүүдө. Ар бир өлүм – бул трагедия. Эгерде вирустун таралышына тоскоолдук кылбасак, анда адамдар өлөт. Толук карантинди кайрадан киргизүү коркунучу бар”, – деген Гебреисус. Кечээ, 14-сентябрда дүйнөдө пандемия башталгандан бери сутка ичинде коронавирус аныкталгандардын рекорддук көрсөткүчү катталгандыгы кабарланган.

Дональд Трамп Хабиб Нурмагомедовду дүйнөдөгү эң мыкты мушкер деп атады

15-сентябрь 2020/informator.kg-АКШ президенти Дональд Трамп орусиялык мушкер Хабиб Нурмагомедовду салмак категорияга карабастан дүйнөдөгү эң мыкты мушкер деп атады. Бул тууралуу президент UFC уюмунун президенти Дана Уайт жана шайлоочулар менен жолугушуу учурунда айткан. “Мен сизге дагы бир мыкты мушкер Жастин Гэйтжи жөнүндө айткым келет. Ал дүйнөдөгү эң мыкты мушкер менен беттешкени жатат. Ал Хабибди техникалык нокаут менен утаарын айтты. Мен бул беттешти сөзсүз көрөм. Ишенсеңер болот, бул укмуштуудай беттеш болот”, – деген Трамп. Белгилей кетсек, UFC мушкерлеринин рейтингинде Хабиб Нурмагомедов америкалык мушкер Жон Жонстон кийин экинчи орунда турат. Нурмагомедов-Гэйтжи беттеши 24-октябрда Абу-Даби шаарында көрүүчүлөрсүз өтөт.

Краснодарда көп кабаттуу үйдөн өрт чыгып, 54 үй-бүлө үйүнөн ажырады

15-сентябрь 2020/informator.kg-13-сентябрь түнү Орусиянын Краснодар шаарында көп кабаттуу үйдөн өрт чыгып, 54 үй-бүлө үй-жайсыз калды. Бул тууралуу орусиянын жалпыга маалымдоо каражаттары жазып чыгышты.Маалым болгондой, өрт Краснодардагы Российская көчөсүндө жайгашкан 8 кабаттуу үйдүн 8-кабатынан чыккан. Өзгөчө кырдаалдар министрлигинин борбордук башкармалыгынан билдиришкендей, өрт тууралуу билдирүү жергиликтүү убакыт боюнча саат 02:14тө келип түшкөн. 6 мүнөттөн кийин өрт өчүрүүчүлөрдүн биринчи бөлүмү келген учурда, көп кабаттуу үйдүн 800 чарчы метр аянты күйүп кеткен.Тилсиз жоонун аянты 4,4 миң чарчы метрге жеткенде, саат 5:30да өрт толугу менен өчүрүлгөн. Өрт өчүрүүгө 175 өрт өчүрүүчү жана 54 техника, өрттү өчүрүүгө жана адамдарды эвакуациялоого коңшу гарнизондордун бийик техникалары тартылган. Эксперттердин айтымында, куткаруучулардын ыкчам жана координацияланган иш-аракеттеринен улам адам өлүмү катталган жок. Өрт чыккан көп кабаттуу үйдө жашаган 300 адам коопсуз жайга көчүрүлдү.

Тажикстанда коронавирусту жуктургандар 9 миңден ашты

13-сeнтябрь 2020/informator.kg –Өткөн суткада Тажикстанда 37 адамдан коронавирус илдети аныкталды. Бул тууралуу тажикстандык басылмалар жазып чыгышты. Маалыматка ылайык, бир суткада 37 адам илдеттен сакайып чыкты. Каза болгондор жок. Жалпы коронавирус жуктуруп алгандардын саны 9 миң 14, анын 7 миң 782си айыгып чыкты.