13-октябрь 2020/informator.kg- Карабахта согуш операцияларынан улам Азербайжандын 42 жараны каза таап, 206 адам түрдүү жаракат алып, 1479 жаран үйсүз калды. Бул тууралуу Азербайжандын Башкы прокуратурасы тараткан билдирүүдө айтылат. Белгилей кетсек, 9-октябрда Азербайжан менен Армениянын Тышкы иштер министрлери Орусия Федерациясынын президентинин чакыруусу менен Москвага келишип, 10 сааттан ашык сүйлөшүү жүргүзүшкөн. Натыйжада, Ереван менен Баку 10-октябрь саат 12ден баштап, Карабахта ок атышууну токтотууга, туткундарды жана каза болгондордун сөөгүн алмашууга, ошондой эле элдешүүнүн конкреттүү деталдары боюнча макулдашышкан. Бирок ишемби күнү тараптар бири-бирин «макулдашууну бузду» деп айыптай башташты.